Shillong, Rymphang 18
U nongtrei mon sngewbha hapoh jong ka Meghalaya State Social Activist (MSSA), Bah Banshai Marbaniang u la pynpaw ba bun na ki paidbah nongshong shnong ka shnong Mawsynram ki la ïam lynñiar namar ka jingkyrduh um kaba la ktah shi kat dei ïa ki haduh ba kin hap rah ïa la ka pliang ja sha wah ban leit sait.
“Nga la shem bad lap da la ki jong ki khmat haba nga poi hapoh shnong halor kiba bun ki bynta kat haduh ban hap shu thied ïa ka umbam-umdih na kiwei pat ki jaka. Kane ka la long ka jingeh kaba khraw kaba la ktah khamtam ïa ki paidbah nongshong shnong kiba duk kiba kyrduh halor kiba bun ki liang haduh ba kim lah shuh ban thied umbam-umdih na shawei,” la ong u Bah Marbaniang ha ka kyrwoh khubor da kaba bynrap ba kito kiba wanrah um ki hap ban leit kit naduh na jngai ha ka dor kumba T. 1,000 tang na bynta 1000 litar.
Na ka liang utei u rangbah u la ïakynduh bad pynsngew ruh ïa katei ka jingeh sha u Executive Engineer (EE) kumjuh sha u SDO ba dei khmih ïa ka thaiñ lyngba ka tnad treikam ka Sorkar – Public Health Engineering (PHE)
“Ka jingujor jong nga sha ka tnad (PHE) ka long ban buh jingkylli ba kaei ka daw kaba la wanrah haduh kat katei ka jingeh ban kyrduh um haba ka pyrthei kylleng sawdong ka tip bad sakhi kum ka shnong ba jur slap ha pyrthei? Nga la kylli halor ka jingwan jong ka projek Sorkar Pdeng, ka Jal Jeevan Mission (Water Life Mission) ba balei ka pynlong haduh kumtei haba katne la pyntyllun ïa ki kam ban trei?,” u la ong.
U la ong ruh ba ka jubab na ka tnad PHE ka long ba dei tang namar ba dang duna palat ki jaka pynlang um kum ki tyllong umbam-umdih ban ïoh hapoh ka shnong Mawsynram kaba la pynlong ïa ka jingkyrduh ha ka liang ka umbam-umdih.
U Bah Marbaniang u la ïathuh ba u Engineer u la ong ruh ba hapoh katei ka shnong khlem la ïoh lad lyngba ka projek ban thaw ïa ki tyllong umbam-umdih ne ki jaka ban ring um hynrei la ïoh ban thaw thymmai tang ki top um lem bad ban shu pynring um hapoh ki tnum ïing jong ki briew.
Ha kawei ka liang, u la ong ba u Engineer lem bad u SDO ka tnad PHE ki la kular ban pyrshang ha ka ban wad ki lad bad ki lynti halor kano ka rukom ban thaw ïa ki tyllong umbam-umdih na ka bynta ban wanrah ïa ka jingshongsuk shongshngaiñ jong ki paidbah ka thaiñ ha kaba ïadei bad kane ka jingeh.
Haba kdew ba u la ïoh ruh ban pynsngew sha ka Dorbar Shnong Mawsynram halor katei ka jingeh, utei u nongtrei mon sngewbha u la ong ba haduh kine ki sngi, ka dang ïai sah kumjuh khlem da shimkhia lyngba ka shnong namarba bun ki ‘riew saiñ pyrthei ki la pynlong ïa ka rukom synshar paidbah kum ka tnad khaïi pateng.
“Nga pynsngew ruh ïa kane sha ka shkor jong ki nongmihkhmat kum u Bah Ollan Sing Suiñ uba long MLA, uba la mihkhmat na ka UDP kumjuh sha u Bah Alvin K. Sawkmie uba long u MDC ba mihkhmat na ka NPP lyngba jong ka Mawsynram konstitwensi ba kin shimkhia da kaba wad ki lad ki lynti kumno ban weng ïa ka jingeh jong ki paidbah jong ka konstiwensi da kaba wanrah ki jingkyrshan katkum ki jingdonkam lyngba ki bor jong ka Sorkar bad ban weng ïa ka jingsngew seng da kaba ïeng ban treikam katkum ka bynta hapoh ka phang ba ‘Khlem ka Party da Jinglaitluid halor ka Ri Synshar Paidbah’ katkum ka bynta ba donkam ha ka ban wanrah ka jingsngewtynnad ïa ki paidbah kiba long ki nongjied ban phah shapoh ka Ïingdorbar Thawaiñ ne District Council,” u la ong.
