Shillong, Rymphang 18
U Rev. H.L. Myrsing u la ong ba kumno ki Khristan ki dei ban leh haba U Blei U sngap jar haba ki ïakynduh shibun ki jingeh, hynrei u la ong ba kim dei ba phetrieh namar U Blei U don la ka jong ka jingthmu.
Ïa kine ki kyntien u Rev. Myrsing u la kren ha ka Jingïaseng Presbytery Mawphlang jong ki rangbah kaba sanphew saw ha Balang Presbyterian Pomblang kaba hap ha Pyndensohsaw District kaba la sdang naduh ka 16 tarik bad la pynkut ha ka Sngi U Blei ka 18 tarik Rymphang.
U Rev. Myrsing uba sam ïa ka ktien jong U Blei ha ka por 1:30 nohphai sngi, u la sot na ka kitab kaba 1 Syiem ka lynnong kaba 19 bad dkhot kaba 9 kaba ong, “Me leh aïu hangne ko Elija”.
U la ïathuh ba ki don ki Khristan kiba la phah weng noh ïa ka jinglong dkhot na ka Balang namar kim kwah shuh ban long Khristan namar U Blei um sngap haba ki la duwai hynrei ha ka jingshitom u khun jong ki u la khlad noh.
Namar kata, u la kyntu ïa ki riewngeit khristan haba U Blei U sngap jar hato phin phaidien noh, hynrei dei ban ïaineh haduh ba U Blei un sngap ïa ka jingduwai jong phi.
U la pynkynmaw biang ba ka jingsngap jar jong U Blei hapdeng ka jutang kaba rim haduh ka jutang kaba thymmai ka long haduh 400 snem. Hynrei hadien 400 snem u la phah ïa u Jisu Khrist ban kha ha shyngoid ban pynim ïa ki briew ha ka pyrthei.
Nalor nangta, u Rev. Myrsing u la kren ruh shaphang ka jingsheptieng namar ka dei ka jingpang kaba shyrkhei namar ha kine ki sngi ki briew ki shim ïa ka jingim lajong namar ka jingsheptieng.
Ha kane ka Sngi U Blei ha ka por 10:30 mynstep la sam ïa ka ktien U Blei da u Tbn. A Marbaniang bad la pynïaid ka jingïaseng da u Moderator ka Presbytery u Tbn. R.F Lyngkhoi bad la pynrhem shuh shuh ïa ka jingïaseng da ka jingrwai na ka Jingïaseng Khynnah Balang Pomblang, Jingïaseng Samla Balang Lumkorbar, Balang Mawdngung, Balang Pomblang, Balang Mawngap bad ka Standing Choir Presbytery Mawphlang.
Katkum ka kaiphot ba la pynsngew ha ka jingïaseng paidbah, la pyntip ba ka jingdon ki khlieh khristan ha Presbytery Mawphlang ka la kot palat arphew san hajar ngut na ki 11 tylli ki district.
