Shillong, Rymphang 18
Ka Federation of Khasi Jaiñtia Garo People (FKJGP) East Jaintia Hills District ka ai ka jingïaroh ïa ki ar tylli ki shnong kata ïa ka shnong Umrasong bad ka shnong Nongsning ha East Jaintia Hills kiba la mih shakhmat ban pynpaw ïa ka jingeh ba ki ïakynduh naduh ba don ki karkhana Coke hapoh ki shnong.
Ha ka kyrwoh khubor ba la pyllait da u President Bah DH Sumer bad u General Secretary Bah E Sutnga, ki la ong ba kum ka seng ka sngew ba ka sienjam ba la shim da ki ar tylli ki shnong ka long kaba dei eh namar kitei ki karkhana Coke ki pynsniew ïa ki tyllong umbam umdih jong kitei ki ar tylli ki shnong ka ban ktah ïa ka koit ka khiah ki nongshong shnong bad ka jingpynmih ïa ka lyer kaba jakhlia kaba lah ban wanrah ki jingpang ba bunjait na ka ring bad pynhiar mynsiem jong ki paidbah.
Ki la ong ba kum ka seng ka dap da ka jingsngewkhia na ka por sha ka por ïa ka rukom long ka mei mariang hapoh East Jaintia Hills namar la bun sa tang ki lad pynjot ban ïa ki lad pynbha bad ñiar eh ban shem ban don ki Dorbar Shnong ban sngewkhia halor kane.
Shuh shuh ki la ong ba lah ban kdew ba hadien ka jingujor ki ar tylli ki shnong sha u Member Secretary ka Meghalaya State Pollution Control Board (MSPCB) Shillong, ha ka sngi Thohdieng la wan jurip da katei ka tnat ïa ka rukom long ka umbam umdih ha kitei ki shnong bad ka seng ka ai ka jingkyrshan ïa ki ar tylli ki shnong ban dawa ban pynduh ïa ka jingïoh Consent to Establish (CTE) namar ka jingnang pynbun shuh ïa ki atoskhana ha ki Coke Plant bapher bapher ka long ka jingshun ïa ka mei mariang bad kyrpang ïa ka koit ka khiah u paidbah jong ka thaiñ.
