Shillong, Rymphang 18
Ka Dorbar Mang Tyngka jong ka Jylla kan bteng biang ha kaba kan don ka jingïatai ha ka Lah Sngi U Blei halor ka jingkren jong u Lat kaba u la dep ai jingkren ha ka 16 tarik mynta u bnai kaba dei ka sngi sdang jong ka Dorbar Mang Tyngka.
Ka jingïatai halor ka jingkren jong u Lat kan bteng ha kine ki sngi ban sa wan ha kaba u Myntri Rangbah u Conrad K Sangma un sa jubab halor kiba bun ki mat kiba ïatai. Ïa ka jubab yn sa ai ha ka 21 tarik mynta u bnai.
Dei ha kane kajuh ka sngi, kata ha ka 21 tarik u Myntri Rangbah un wanrah ïa ka mang tyngka ha Ïingdorbar. Kan sa don ruh ka jingïatai halor jingwanrah ïa ka mang tyngka ka Jylla na bynta u snem 2024-2025.
Kane ka dorbar mang tyngka kaba la sdang ha ka 16 tarik bad kan kut ha ka 27 tarik u Rymphang.
Ka Dorbar Mang Tyngka ka la sdang da ka jingkren jong u Lat ha Ïingdorbar ha ka 16 tarik Rymphang, ha kaba u la kren da ka ktien Hindi bad pule ruh khyndiat ïa ka ktien Khasi bad Garo kum ka jingai khublei ïa ki dkhot ka Ïingdorbar hashwa ba un ai jingkren.
