Shillong, Rymphang 18
Ka surok kaba dang ïaid shaid-shaid ka jingshna na Mawlai Bypass sha Umroi lyngba ka shnong Umsaw Mawjynrong lehse kan long ka jingïarap ban pynduna ïa ka jingïaid ki kali lyngba ka jingkieng Um-ïam ynda la lah ban pyndep ïa kane ka projek.
Kane ka projek ka dei kaba la urlong hadien ba u MDC ka Mawlai, u Bah Teiborlang Pathaw u la maitphang ha u 2020 ynda u la shahjied kum u MDC ha u snem 2019.
Ïa kane ka projek kaba kham kongsan bha, ka jingshna ka la ïaid shaid-shaid ha kaba ka Sorkar Jylla ka la ïoh ïa ka jingmang pisa kumba T.34 klur na ka North East Special Infrastructure Development Scheme (NESIDS) lyngba ka North Eastern Council (NEC).
Haba pynkynmaw ïa ka sienjam na ka bynta kane ka surok, u Bah Pathaw u la ong ba ha u snem 2019 ynda u la shahjied kum u MDC u dap da ka jingsngewkhia haba peit ïa ka jingkhapngiah bad ka dheng kali ha shilynter ka surok Shillong-Guwahati khamtam ha thaiñ Mawlai ter ter shaduh Petrol Pump. U la ong ba ka don ruh ka jingïakren shaphang ka jingbymshngaiñ ïa ki nongleit nongwan haba ïaid ki kali lyngba ka jingkieng ha Umïam ka bynta ba den ïa ka Pung Umïam.
Kumta u la ong ba wat lada u dei tang u MDC u la sngew dei ban tyrwa sha ka Sorkar ban thawlad noh ban shna sa kawei ka surok kaba kham heh ka ban poi beit-beit sha Umroi lyngba ka Mawtawar ter ter sha Mawsiatkhnam, Umrynjah.
Hynrei u Bah Pathaw u la ong ba u la pynpaw sha ka tnat PWD ba ka surok na thaiñ Mawtawar ka kham rit bad ki don bynta kiba kham thiep bha khamtam ki kali ki wan kiew na thaiñ Nongkohlew sha Mawtawar.
Kumta u la ong ba ka Sorkar ruh ka sngap bad shimkhia namar donkam ban ïoh sa kawei ka surok kaba kham heh ban pynkiar ïa ki kali ban nym ïaid na jingkieng Umïam.
“Ka Sorkar ka sngewthuh bha ba kane ka surok ka dei kaba kongsan bad kumta la sdang ban peit ïa ka jaka bad pynïaid ter ter ïa kane ka projek naduh u snem 2020 haduh ba kan da urlong mynta ha kaba ka jingshna ka la ïaid shaphrang,” u la ong.
Une u MDC u kyrmen ba kane ka surok ynda la dep ban shna bad ynda la ïaid ki kali kan long ka jingmyntoi ïa ki paidbah ym tang jong ka Mawlai konstitwensi hynrei ka nongbah Shillong bad kiwei kiwei kiba donkam ban pyndonkam ïa kane ka surok, bad kan ïarap ruh ban pynduna ïa ka jingïaid ki kali lyngba ka jingkieng Umïam.
Ïa kane ka surok kaba ïaid lyngba ka shnong Umsaw Mawjynrong la mang pisa lyngba ka North East Special Infrastructure Development Scheme (NESIDS) kumba T.34 klur. Ka jingjrong kane ka surok ka long kumba 14.279 km bad kan poi sha Umjathang bad sha Madan Nongkhiat ter ter sha Shillong Bypass.
Kum ban shu pynkynmaw, u MLA barim ka Umroi, u Bah George B Lyngdoh ruh u la kren teng mynshwa halor ka jingdonkam ban shna bha ïa ka surok na thaiñ Umroi sha Mawlai lyngba ka shnong Mawsiatkhnam khnang ba ki kali kin lait na ka dheng kali haba wan sha Shillong bad ruh ban kham duna ki kali kiba ïaid lyngba ka jingkieng Umïam.
