Khliehriat, Rymphang 18
Ka Proseshon Eucharist jong ka Umkiang Parish kaba la long ha ka Sngi U Blei ha Holy Cross Parish, Umkiang ka la long kaba i-shongkun da ka jingwan ïashim bynta ki paid ‘riewngeit na kylleng ki Balang.
La sdang ïa ka Proseshon Eucharist da ka Mass Bakhuid kaba la khlieh da u Vicar General ka Jowai Diocese, Fr. Martin Shylla ha ka jingsynran lang ki Lyngdoh, Parish Priest jong ka Umkiang Parish, Fr. Francis Sabestian, ki Sister bad ki paid ‘riewngeit.
Ka phang pdeng jong kane ka sngi ka long “La pyndep ïa ka ïa bad ka hima U Blei ka la jan, To phin kylla kaba mut bad ngeit ruh ïa ka Gospel” (Mk 1:15).
U Vicar General ka Jowai Diocese, Fr. Martin Shylla u la kren shaphang ka jingngeit bad khot ïa baroh ki Lyngdoh ki ‘riewniam bad ki paid Katholik sha ka jingkylla kaba mut khamtam eh ha kum kane ka por ‘Lent’ kaba dei ka aïom kaba kyrpang jong ka Balang Katholik.
U Fr. Martin Shylla u la sneng la kraw ruh ïa ki paid ‘riewngeit ban phai sha ki mat kiba kongsan ha ka jingim Khristan ha kane ka aïom ‘Lent’ kita ki mat ki long, ban jan sha U Blei, ban ïasuk bad U Blei kumjuh ki para briew.
Ha kane ka sngi la don 118 ngut ki khynnah kiba la ïoh pdiang ïa ka Communion ba nyngkong bad 53 ngut ki samla kiba la ïoh ïa ka jingpynskhem.
Ïa ka Sakrament jingpynskhem la pyndep da u Bishop Most Rev. Ferdinand Dkhar ha ka Sngi Saitjaiñ.
Hadien ka jingkñia Mass, ki paid ‘riewngeit ki la ïashim bynta shitrhem ha ka jingïaid riewblei lynter ka surokbah NH-6 ban pynpaw ïa ka jingïatylli bad ka jinglong kawei ha U Jisu Khrist.
Ha katei ka jingïaid ‘riewblei, ki bangeit ki la shim bynta lyngba ki jingduwai, jingrwai ïaroh pyndonburom ïa u Jisu Khrist uba don ha ka Eucharist Bakhuid bad la pyniphuh pyniphieng shuh-shuh ïa katei ka jingïaid ‘riewblei da ka jingriam lieh jong ki heprit ha ryngkat ka jingsynran lang ki Sister bad ki Lyngdoh.
