Shillong, Rymphang 18
Ka tamasa ‘Escape To Nongjrong’ harud ka Wah Umngot ha Mawkynrew C&RD Block kaba la sdang ha ka 16 tarik u Rymphang, 2024 ka la kut noh ha ka janmiet 17 tarik u Rymphang, 2024 da ki jingtem bad jingrwai na ki nongrwai ba pawnam ka Ri-lum Khasi-Jaiñtia ba kynthup ïa ka samla Bahun Marweiñ, Gracyl Ropmay, Banjop Nongbri, Wanjop Sohkhlet ryngkat ka kynhun Mar Local nalor kiwei ha ryngkat ka jingwan sakhi jong ki phew hajar ngut ki paidbah ym tang na katei ka thaiñ hynrei na kylleng kynthup kito kiba wan jngohkai na kiwei ki Jylla bad na shabar Ri kumjuh.
Hashuwa, ka la don ruh ka jingïakob pyni dur bhabriew ryngkat ka riam ka beit ba la ïashim bynta da ki samla kynthei bad shynrang lem ki longkmie na ki shnong bapher-bapher kiba hap ha ka Mawkynrew konstitwensi.
Ïa ka nam lahduh ha ka liang ki longkmie lane ‘Mrs. Mawkynrew 2024, la rah da ka Kong Kyntulang Rynjah na Synñiasya, katba ka kyrdan ba-ar ka la leit sha ka Kong Shembhalin Mynsong bad ka kyrdan kaba lai pat la ïoh rah da ka Kong Ailibon Khriam. Kine baroh 2 ngut ki dei na Jongksha.
Haba phai pat sha ki samla shynrang lane ‘Mr. Mawkynrew 2024’, u samla Banpyndaplang Ryndong na Thangsning u la ïoh ïa ka nam lahduh, katba u samla Willborn Mynsong na Mawleiñ u la wan ba-ar bad ka kyrdan ba lai ka la leit sha u samla Kyrshanborlang Kharumnuid na Rapleng.
Ha ka jingïakob ki samla kynthei lane ‘Miss Mawkynrew 2024’, ïa ka nam lahduh la rah da ka samla Dabisharbha Mylliemngap bad ïa ka kyrdan ba-ar da ka samla Deibyntalang Mylliemngap kiba na Laitkyrhong katba ïa ka kyrdan ba lai la rah da ka samla Jesica Nongpluh na Kharang.
Ki khusnam pisa na ka bynta kitei ki kyrdan jingïakob ki long T.25,000 ïa kiba wan banyngkong, T.15,000 ïa kiba wan ba-ar bad T.10,000 ïa kiba wan ba lai. Hashuwa ki jingtem jingput, ka la don ruh ka prokram jingshad da ki longkmie ka thaiñ Mawkynrew ba la lam khmat da ka Dr. Amanda A. Pakynteiñ kaba dei ruh ka kurim u Bah Banteidor Lyngdoh, MLA ka Mawkynrew.
Ïa kane ka tamasa la khot pynlong da ka Mawkynrew Tourism Sociable Society (MTSS ) hapoh ka jingïalam u Bah Banteidor kum u President, u Bah Olet Kharsahnoh kum u Secretary nalor kiwei-kiwei ha ryngkat ka jingïatreilang bad ka tnad kam jngoh kai ka Jylla bad bor pynïaid shnong ka Nongjrong hapoh ka jingïalam u Sordar, Bah Pynshai Synjri Sordar.
Kane ka tamasa ka long ruh kum shi bynta ban kyntiew ïa ki kam jngohkai pyrthei ha ka thaiñ ka Mawkynrew.
Kum ban shu kdew hangne, ka shnong Nongjrong ka dei ka shnong kaba paw bha ha ka jingkhring ïa ki nongshangkai pyrthei na ka jingitynnad ki kjat sngi ha ka por mih sngi mynstep halor u lyoh ha ki them ka Wah Umngot kaba ker pyllun ïa katei ka shnong.
Kane ka shnong ka don ha ka ïa ka mariang kaba ithiang, ki jait jingrep kum u sohñiamtra, ki jingtem bad ki jingrwai tynrai ha ryngkat ka riti dustur bad ka rukom im.
Ha ki ar sngi jong kane ka tamasa, ki nongshong shnong kumjuh kito na ki Self Help Group (SHG) bapher-bapher ka thaiñ kumjuh kiba nabar konstitwensi ki la wanrah ïa ki mar jingdie jong ki kynthup u sohñiamtra, ki jingbam tynrai, ki mar rep, ki um soh, ka waiñ bad kiwei pat ban ïadie-ïathied ha kane ka tamasa nalor kiwei-kiwei.
Nalor kine, ki nongpynïaid ki la pynkhreh ruh ïa ki jaka sah miet ne ‘camping’, ka jingïaking lieng kynda ne ‘kayaking’, ka jingpynher ‘parachute’ ne ‘paragliding’, ki jinghiar tyllai na shiliang sha shiliang ka Wah Umngot nalor kiwei pat ki prokram.
Ha ka sngi sdang jong kane tamasa ha ka por janmiet ki la don ruh ki jingrwai jingtem na ka kynhun Snow White bad kiwei ki kynhun tem bad kynhun rwai na ka thaiñ.
U Bah Banteidor haba kren ha ka jingïalang plie ïa kane ka tamasa kum u Kongsan u la ong ba ka jingthmu jong kane ka tamasa ka long ba ki nongshong shnong kin shim ïa ki lynti ban kyntiew ïa ka ïoh ka kot na ka kam jngohkai pyrthei bad ïa ka Society ruh la seng ha kane ka nongrim.
“Naduh u 2018, ngi la pyrshang lem bad u Bah L.T. Tariang, BDO ka Mawkynrew ha katei ka por ban kyntiew ïa ka kam jngohkai ha kane ka shnong bad suki-suki mynta na ka jingsdang kaba rit ka la nang pynïoh lad ïa ki nongshong shnong ban ïoh kamai da kaba ba buh bad don mynta haduh 7 tylli ki ïing basa na ka bynta ki nongwan jngohkai,” la ong u Bah Banteidor.
Da kaba pynpaw ba ka Mawkynrew ka don bun tylli ki jaka jngohkai ba itynnad nalor ka Laitlum, Syntung, ka Kshaid Pdem ha Khlieh- A- Sem, kaba ki briew ki la hiar na ka por sha ka por ban leit jngohkai, u MLA u la ong ba ka bor ka jingïatreilang kan lam sha ka jingjop ha kino-kino ki kam kiba thmu bad kane ka sien ba mynta ka dei kaba nyngkong ïa ka thaiñ.
