Mangaluru, Rymphang 18 (UNI)
U President ka seng Congress, u Mallikarjun Kharge, ha ka Sngi Saitjaiñ u la ong ba u Myntri Rangbahduh ka Ri, u Narendra Modi, u kwah ban long ‘Dictator’ lane u nongsynshar donbor bad ban pynïaid hi lut ïa ka synshar ka khadar ha ka Ri.
“U Modi u kwah ban long ‘Dictator’ bad ban pynïaid hi lut ïa ka synshar ka khadar ha ka Ri kynthup ïa ki shnat jong ka sorkar kiba pyntreikam ïa ki aiñ ki kanun bad ïa ki lad pathai khubor,” la ong u Kharge haba sdang ïa ka jingïalang ilekshon Lok Sabha jong ka seng ha Karnataka.
Ha kajuh ka por, u Kharge u la pynpaw ïa ka jingsngew skhem ba ka Congress kan jop ym duna ïa ka 20 ngut ki MP ha ka ilekshon Lok Sabha na Karnataka. U la kynnoh ruh ba ka sorkar jong u Modi ka la pulom ha ka jingpyntreikam ïa ki jingkular sha ki paidbah. Tangba u la kam ba ka sorkar Congress ha Karnataka ka la lah ban pynurlong ïa ki jingkular jong ka.
Shuh shuh u la ong ba u Modi u bunkam ban kyntiew ïa ka kyrteng lajong katba ka Congress ka pynleit jingmut ha ka jingïatreilang jong baroh.
“Ka BJP ka lehkai bad ki jingsngew jong ki paidbah, bad ka shim kabu da kaba wanrah jingïapait ha ka kyrteng ka niam bad jaitbynriew hapdeng kito ki nongshong shnong kiba khlem pat ïohi ïa kita ki sngi kiba bha lyngba ka sorkar BJP ha ki 10 snem ba la leit noh,” u la bynrap.
