Shillong, Rymphang 19
Ka um ka dei kawei na ki jingdonkam bakongsan tam jong u briew. Ka jingrngad ki tyllong um ha kylleng ki jaka ka la pynlong ïa ki MLA ban buh jingkylli haba ïadei bad ki lad ki lynti ban ïada bad pynneh pynsah ïa ki tyllong um kiba la don lypa ban tan um kumjuh ruh ki tyllong um kiba la lap thymmai ban tan um na ka bynta ka skhim Jal Jeevan Mission (JJM).
Ïa kane ka jingkylli la wanrah da u MLA ka Sohïong konstitwensi, u Bah S.K.R. Lyngdoh Thabah ha ka kynta kylli jingkylli jong ka dorbar mang tyngka ha Ïingdorbar ha ka Lah Sngi U Blei.
U la kylli shaphang ki tyllong um kiba tan um ban sam sha ki longïing lyngba ka skhim JJM bad ki lad ban lap ïa kiwei pat ki tyllong um na ka bynta ka nongbah Shillong khnang ban pynduna ïa ka jingshaniah tang ha ka tyllong um kaba la den ha Mawphlang khamtam haba la mih sa ka New Shillong Township bad ka jingnang roi ki briew bad nang bun ki longïing.
U Myntri ka tnat PHE u Marcuise N Marak haba u ai jubab, u la ïathuh ba kiba bun ki tyllong um kiba tan ban sam um sha ki longïing lyngba ka skhim JJM ki dei kiba tuid bad kiba mih na shapoh.
U Marcuise u la ong ba ka Sorkar ka la shim bun ki lad kumno ban ïada bad pynneh ïa ki tyllong um bad ki wah wat hapdeng ka jingeh kaba mad namar ka jingkylla ha ka jinglong jingman ka suiñbneng bad ka mariang.
U la ong ruh ba ka thong kaba ka Sorkar ka la buh ban pynpoi um lut sha ki longïing lyngba ka JJM ka dei ha u Lber, 2024. U MLA ka Nongkrem u Bah Ardent Basaïawmoit u la buh jingkylli katno ki tyllong um kiba la lap thymmai ban tan um ban pynpoi sha ki longïing lyngba ka JJM.
U Marcuise u la ong ba kiba bun ki tyllong um kiba tan um na ka bynta ka JJM ki dei kiba rim bad kiba la pyndonkam lypa.
Na ka liang u Bah Ronnie V Lyngdoh, nongïalam ka Liang Pyrshah bad MLA ka Mylliem u la buh jingkylli halor ka jinglong jingman ka Wah Umïew bad ki lad ban ïada bad pynneh pynsah ïa ki jaka khlaw namar kane ka dei ruh ka tyllong um kaba ai um ïa ki nongshong shnong ym tang ïa ka thaiñ Upper Shillong hynrei ïa ka nongbah Shillong ruh kumjuh.
Ïa kane ka jingkylli la jubab da u Myntri Rangbah u Conrad K Sangma uba la ïathuh ba ka Sorkar Jylla ha ryngkat ka KfW (German Development Bank) ka la sdang ïa kawei ka projek kaba tip kum ka MegARISE. Kane ka dei na ka bynta ban pynbha bad ïada ïa ka Wah Umïew ha East Khasi Hills district bad Wah Ganol ha Garo Hills namar ki dei ki wah kiba pyndonkam ban tan umbam umdih. Kane ka projek ka dei kaba la mang T.344 klur.
Halor ka jingkylli u MLA ka Mawsynram, u Bah Olan Sing Suiñ, kiba kumno ki lad ka Sorkar ka shim ban pynneh pynsah ïa ki tyllong um kiba don ha ki shnong ki thaw, u Marcuise u la ong ba ka jingpynneh ïa ki um ki wah ka long hapdeng ka jingïakhun bad don ki jingeh, ha kaba ka Sorkar thaw ki lad bad ïaleh katba lah ban pynbha pat ïa ki wah kiba dei ruh ki tyllong um kynthup lyngba ka skhim Climate Adaptive Programme.
Shuh shuh u Myntri Rangbah u la bynrap lang biang da kaba ong ki don bun tylli ki projek kiba la shim ki lad ki lynti da kaba donbynta lang bad ka NESAC bad ïada bad shna ïa ki jaka pyllang um nalor ka jingpynneh ïa ki khlaw ki btap kiba don hajan wah bad hajan ki tyllong um.
