Shillong, Rymphang 19
Ka nongïalam jong ka NPP ka Kong Ampareen Lyngdoh kaba dei ruh ka kyrtong ban ïakhun ïa ka ilekshon MP sha Lok Sabha ka la ong ba katba nang beiñ katta ka seng NPP kan dang khlaiñ bad suhthied. Ka Kong Ampareen kaba dei ruh ka Myntri ka jylla ka la kren ïa kane ha ka jingïalang pdiang ïa ki ar ngut ki MDC bad uwei u MDC barim sha ka seng NPP ba la pynlong ha shlem treikam ka NPP ha Lachumiere ha ka Lah Sngi U Blei. Ka la ong ba ka jingsuhthied bad khlaiñ jong ka NPP ka la paw lyngba ka jingwan pynïasoh jong ki lai ngut ki rangbah, kata ar ngut ki MDC ba mynta bad uwei u MDC barim ka Sohra.
“Nga don ïa ka jingkyrmen kaba khraw ba lyngba ka jingwan pynïasoh jong kine ki MDC ngin sa ïoh ka jingjop ha ka ilekshon MP,” ka la ong bad bynrap “Ka khubor ba ka NPP ka phah sha phi ki nongshong shnong ka jylla, khamtam lei sha ki nongkyrshan jong kine ki MDC ba kim dei ban smiej, tieng ne ban shah ïalam bakla, bad wat nym khuslai ka NPP kan dang khlaiñ bad suhthied.”
Ka Kong Ampareen ka la ong, “Dei sa tang kane ka seng kaba lah ban pyni ïa ka Sorkar India ba ngi dei ka jylla Meghalaya, ha kaba phin hap ban sngap ïa ka jingkren ka jong ngi. Ngin nym shah ban thombor ïa ngi, ngi nang khlaiñ bad nang ïar ka jingpynïasoh bad kumta ka Sorkar Kmie kan hap sngap.”
“Wat ju sheptieng namar phi la poi ha ka jaka kaba bit ba biang, wat shah pyntieng ne pynsmiej ha kiwei ar kiba ong ba dei ma ki, ki nongïalam ba kynsai,” la ong ka Kong Ampareen ïa ki nongkyrshan kiba la wan pynïasoh sha ka seng NPP.
