Shillong, Rymphang 19
U Myntri Rangbah ka Jylla Conrad K Sangma ha ka Lah Sngi U Blei u la pyntip ba ka Sorkar Jylla ka la ailad ha ki District Selection Committee (DSC) ba kin mynjur hi ïa la ki jong ki Reservation Roster na ka bynta ki kam ba lait hapoh ki district.
“Haba don ki kam ba lait, ym donkam shuh ïa ka DSC ban dang phah ïa ki kot ki sla sha ka tnat Personnel na ka bynta ban ïoh ïa ka jingmynjur ha kaba ïadei bad ka Roster System, hynrei kin ai ïa la ki jingmynjur khnang ba ka kam kan ïaid beit bad kan nym slem,” la ong u Myntri Rangbah haba jubab ïa ka jingïatai ‘Short Duration Discussion’ ba la wanrah da u MLA ka UDP na Mawkyrwat u Bah Renikton Lyngdoh Tongkhar hapoh ïingdorbar thawaiñ ha kaba ïadei bad ka jingslem jong ki DSC ban pynlong eksam bad pynmih risol.
U Myntri Rangbah u la ong, “Ngi la dep thoh sha ki DSC bad ngi la ai ka jingbthah ba naduh mynta, ka Reservation Roster jong ki kam ba lait ha ki District yn ai jingmynjur noh da u Chairman ka District bad kumta ki kot ki sla kim donkam shuh ban wan sha ka tnat Personnel.”
U la ong ba ki Deputy Commissioner (DC) ki don ïa ka bor mynta, hooid kin hap bud ïa ki kyndon treikam, ban pynïaid shakhmat ïa ka jingthungkam khlem da shim shuh ïa ka jingmynjur na ka tnat Personnel.
Ha kajuh ka por, u Myntri Rangbah u la pyntip ruh ba ka Sorkar ka khlem pat pynkylla satia ïa ka kyntien ha ka 1972 Office Memorandum ba ïadei bad ka Reservation Policy bad kumta lada baroh shi katta ka kam ka ïaid beit, ka mut ba mynta ruh kan nym mih satia ka jingartatien.
Hashwa kane, haba wanrah ïa katei ka mat ïatai, u Bah Renikton u la ong ba katkum ka jingwad ïa ka daw jong ka jingslem ki eksam bad jingpynmih risol, ka jubab ba ju ïoh na ki ophisar ka long beit namar ka ‘Roster’. U la ong ba baroh ki tnat ki hap ban pynbiang ka ‘Roster’ register bad ban sa phah sha Directorate bad nangne sa phah pat sha Secretariat kaba shimpor bha.
U la ong ba hadien ka jingpynmih ka Sorkar ïa ka Office Memorandum ha u snem ba la lah, ka la nang pynklumar jingmut shuh shuh ïa ki ophisar, khamtam lei khamtam lei ki saw tylli ki kyntien ba shadien, ha kaba u la ai jingmut sha ka sorkar ba ïa ka 80% Combine ka bhah thungkam thungkam na ka bynta ki Khasi-Jaintia bad Garo kumba la bud ha ki 50 snem dei ban bteng kumjuh khlem da pynthut, ban amend ïa ka OM da kaba weng noh ïa ki saw tylli ki kyntien ba shadien jong ka bad ban pynbit pynbiang ïa ka Roster. Kiwei pat ki MLA ba la ïashim bynta ha kane ka jingïatai kaba lyngkot ki kynthup ïa u MLA ka Nongpoh Bah Mayralborn Syiem, MLA ka Nongstoin Bah Gabriel Wahlang, MLA ka Mawsynram Bah Ollan Singh Suin, MLA ka Nongkrem Bah Ardent M Basaïawmoit bad MLA ka Amlarem Bah Lahkmen Rymbui.
