Shillong, Rymphang 19
Ka seng National People’s Party (NPP) ka la nang bun paid hapoh ka Khasi Hills Autonomous District Council (KHADC) hadien ba ar ngut ki MDC ka Congress ki la leit pynïasoh noh sha ka NPP ha ka Lah Sngi U Blei.
Ïa kine ki 2 ngut ki MDC ka Congress ba kynthup ïa u Bah Carnes Sohshang, MDC ka Mawkyrwat bad u Bah Batskhem Ryntathiang, MDC ka Mairang la pdiang sha ka ïing NPP da u National President u Conrad K Sangma uba dei ruh u Myntri Rangbah ka jylla ryngkat ka jingdon lang u State President Bah Prestone Tynsong lem bad kiwei kiwei ki nongïalam.
Nalor kitei ar ngut ki MDC ba mynta, la pdiang ruh ïa u MDC barim ka Sohra u Bah Donevan Kharwanlang.
Kane ka jingwan pynïasoh jong kitei ki MDC, ka la nang pynbun paid ïa ka NPP kaba lamkhmat ïa ka Executive Committee ha KHADC katba ka la nang pynstait ïa ka seng Congress. Kumba ka long mynta, ka jingbun paid ki MDC ka NPP ka la kiew sha ka 14 ngut ha KHADC na ka 7 ngut ba ki la jop. Katba, ka Congress kaba la jop nyngkong haduh 10 ngut ki MDC mynta ka la hiar bad sah satang 4 ngut ki MDC.
