Shillong, Rymphang 19
U Myntri barim ka Sorkar Jylla uba dei u MLA ka Amlarem u Bah Lahkmen Rymbui, u la pynsngew ha Ïingdorbar ha ka Lah Sngi U Blei halor ka jinghiar dor u synsar kaba ktah ïa ka ïoh ka kot jong ki nongrep bad u ai jingmut ïa ka Sorkar Jylla ban pyntreikam ïa ka jingkyrshan dor (support price) ban myntoi ki nongrep synsar.
Haba ïashimbynta ha ka jingkren jong u Lat, u Bah Rymbui u la ong ba ha u snem 2020-2021, ka dor u synsar babha tam ka long T.14,000 shi kwintal hynrei mynta 2023-2024 ka la hiar sha ka T.9,000 shi kwintal.
U la ong ba ki nongrep synsar ki hiar ha ka jingïoh na une u mar rep bad haba hiar ka jingïoh jong ki, ka hiar lang ka jingïoh jong ka Jylla.
U la ong ba ka jingpynmih ïa u synsar ha u snem 2020-2021 ka long 70,308 Metric Ton hynrei mynta u snem 2023-2024 haduh u Kyllalyngkot 2024, ka jingpynmih synsar ha Jylla ka long tang 42,778 metric ton.
Namar kata, u Bah Rymbui u la kyrpad ïa ka Sorkar ban thaw ki lad kumno ban pynïaid ïew ïa une u mar rep bad haba hiar ka dor, donkam ban pyntreikam ïa ka jingkyrshan dor (support price) ïa ki nongrep da ka Sorkar.
