Nongpoh, Rymphang 19
Uwei u nongñiah trok u la mynsaw jur hadien ba ka kali kaba u ñiah ka la leit ban tynrah ïa ar tylli ki kali kit umphniang (LPG) ha ki bynta jong ka shnong Shangbangla kaba la jia ha ka janmiet Lah Sngi U Blei ha ka por kumba 4:30 eiei. Katkum ka jingtip kaba la ïoh lum, la ïathuh ba kawei ka trok kaba kit ïa u maw Clinker katba ka dang hiar sha ka thaiñ Guwahati, ynda poi ha ki bynta ba khongwaiñ jong ka surok bah National Highway 6 ha Shangbangla, ka la leit jam sha shiliang bad tynrah pat ïa ar tylli ki kali kit umphniang kiba dang wan na ka liang pyrshah bad kiba dang thmu ban kiew sha nongbah Shillong. Ha kane ka jingjia, u nongñiah jong ka trok kit maw Clinker u la mynsaw jur bad la pynkit noh sha Nongpoh Civil Hospital da ki pulit bad nongtrei ka National Highway Authority of India ((NHAI). Katba, ki nongñiah bad nongbud jong ar tylli ki kali kit umphniang kiba don ïa u number AS01-DD-7762 bad AS01-DD-7763 ki la lait thaw na ki jingmynsaw ha kane ka jingjia.
