Shillong, Rymphang 19
U Myntri Rangbah barim ka Jylla, u Dr Mukul Sangma uba dei ruh u MLA ka TMC na Songsak, u la buh jingkylli ha Ïingdorbar ha ka Lah Sngi U Blei haba ïadei bad ka aiñ Meghalaya Residents Safety and Security Act (MRSSA), 2016 kaba khlem treikam pura ban tehlakam ïa ki briew kiba nabar.
U Dr Mukul u la pynpaw ïa kane haba ïashimbynta ha ka jingïatai halor ka jingkren u Lat ka Jylla.
Ha ryngkat kiwei pat ki mat kiba u la pynpaw, une u MLA bad la rim tam ha ka jinglong MLA, u la pynkynmaw ïa ka aiñ MRSSA kaba la pynwandur da ka jingdonbynta lang ki kynhun bapher bapher ha ka por jong ka Sorkar barim na ka bynta ban pynbha pynkhlaiñ ïa ka jingtehlakam ïa kiba nabar.
U la ong ba ïa kane ka aiñ ym dei ban pynlong kum ka jingïalehkai saiñ hima namarba naduh 2018 haduh mynta, ïa kane ka aiñ la shu thep ha duli khlem pyntreikam.
U la ong ba ka MRSSA ka dei ka aiñ kaba biang tam ha ka ri bad ha ka pyrthei ban pyntreikam.
U la ai nuksa da kaba ong, “Wat ka USA ka eh ban ïoh ka aiñ kaba biang ban tehlakam ïa kiba wan nabar, hynrei ngi pat ngi don ka MRSSA kaba dei ka aiñ kaba khlaiñ bad kaba biang ban pyntreikam.” Kumta u la kyntu ïa ka Sorkar Jylla ban shimkhia ban pyntreikam ïa kane ka aiñ.
Haba kren shaphang ka jingbym khlaiñ ban pyrkhing bad tehlakam ïa ki kam sniew, u Dr Mukul u la ong ruh ba ka Jylla ka mad jingeh mynta namar ka jingjyllei u drok uba ktah ïa ki samla kiba kylla long ki ‘langkñia ban ngop ha une u jingdih basniew. Kumta u la ong ba donkam ban pynkhlaiñ ïa ki khappud la ka dei ki jaka khappud bad kiwei ki Jylla ne ki jaka khappud bad kiwei ki ri namar ïa une u jingdih basniew la lah ban pynpoi lyngba ki jaka khappud.
U Dr Mukul u kren ruh shaphang ka rukom synshar khadar bad ka jingkynrei ka bamsap ha kaba u la ong ba ban ïa ki kam pyntriem dang kham shyrkhei ka bamsap.
U la kdew ruh ba ka jingshalan dewïong bad tih dewïong ka ïai jia namar ka don ka bamsap kaba la don jingtip da kiba don ha ka bor bad kan jin da la long kaba biang eh lada ka Sorkar ka nud ban phah tohkit namar kane ka dei ka kam kaba paw haba rieh.
Haba kren shaphang ki kam pynroi kynthup ki surok, u Dr Mukul u la ong ba ka pisa ka don byllai na ka bynta ki kam pynroi bad ka Sorkar Jylla ka dei ban pyntreikam ban pynbha ïa ki surok na ka bynta ka jingmyntoi jong ka Jylla.
