Shillong, Rymphang 19
Ka surok Western Bypass kan sdang na Lad Umsaw bad kan mih sha Lad Mawreng. Ïa kane ka projek la dep mang T.681.63 klur da ka tnat Road Transport and Highways jong ka Sorkar Pdeng tang na ka bynta ka bai jaka. Ïa kane la ïathuh da u Symbud Myntri Rangbah u Bah Prestone Tynsong uba peit ïa ka tnat shna surok haba jubab ïa ka jingkylli ba la wanrah da u nongïalam ka liang pyrshah u Bah Ronnie V Lyngdoh ha ka kynta kylli jingkylli ha ka Dorbar Mang Tyngka ha Ïingdorbar ha ka Lah Sngi U Blei.
U Bah Ronnie uba dei ruh u MLA ka Congress na Mylliem u la buh jingkylli halor ka jinglong jingman ka Western Bypass naduh ka jingshim jaka, ka jingsdang ban pyntrei bad ka por ban pyndep ïa kane ka surok.
U la kylli ruh ïa ka jingjrong jong kane ka surok bad nangno yn sdang ban shna bad shano kan mih ban pynïasoh bad kawei pat ka surok.
Haba jubab, u Bah Prestone u la ong ba ka kam ban pyndep ïa ka jingshim jaka ka la poi artad ha ka bynta kaba kut bad ka por kaba la buh ban pyndep ïa kane ka surok ka dei 2 snem naduh ka sngi ba pynbna ban aiti pyntrei ïa ka projek.
Haba ïadei bad ka bynta ba ka surok kan sdang, u Bah Prestone u la ïathuh ba ka jingshna ïa kane ka surok kan sdang najan Lad Umsaw bad kan poi shajan Lad Mawreng ha ka jingjrong 38.256 km.
Nalor kane, u la ïathuh ba ka tnat Road Transport and Highways jong ka Sorkar Pdeng ka la dep mang T.681.63 klur tang na ka bynta ka bai jaka bad ïa mynta dang ap ïa ka pisa ba kan poi sha ki Deputy Commissioner jong ki district (East Khasi Hills bad Ri Bhoi) ha kaba la khmih lynti ba kane ka kam kan dep hapoh jong une u snem mang tyngka (2023-2024).
