Nongstoiñ, Rymphang:
Ka West Khasi Student Union (WKSU) Rambrai Circle ka la kyntu ïa u Deputy Commissioner (DC) ka West Khasi Hills District ba un ai NOC na ka bynta ban aiti noh ïa ki surok ba la pyntrei lyngba ka skhim MGNREGA kiba don ha ka thaiñ Rambrai sha ka tnat PWD khnang ba yn ïoh noh ban pynbha.
Halor katei ka bynta, ki nongïalam ka WKSU Rambrai ryngkat ka jingsynran lang ki nongïalam ka WKSU Sengkmie ha ka sngi Nyngkong ki la leit ban ïakynduh bad aiti ruh ïa ka jingthoh sha u DC Bah Garod LSN Dykes ban buddien ïa ka jingsniew ki surok shnong ha ka thaiñ Rambrai.
Shuh shuh ki nongïalam ka WKSU haba kren sha ki lad pathai khubor hadien ka jingïakynduh ïa u DC, ki la ong ba seng ka la kyntu ïa u DC ba un ai NOC na ka bynta ban aiti noh ïa kitei ki surok ba la pyntrei lyngba ka skhim 100 sngi ha ki thaiñ Rambrai sha ka tnat PWD khnang ba yn lah ban shna pynbha, ha kaba la ong ba na ka liang jong u DC u la kular ban shimkhia.
Lah ban kdew ba ha kine ki khyndiat sngi ba la dep, ka WKSU ha ka jingleit jurip ka la lap ïa ki surok kaba pynïasoh ïa Mawdet, Mawshad, Mawkhiat, Umshem, Rynniaw, Mawïong, Domkyrkoh bad Mainop ki long kiba sniew haduh katta katta. Kine ki surok ki dei ruh kiba la shna bad pyntrei lyngba ka skhim 100 sngi ha kaba tang namar ka jingsniew jong ki surok ha katei ka thaiñ, kala wanrah shisha ka jingmad jingeh ïa ka ïaid ka ïeng ki paidbah.
