Shillong, Rymphang 20
Ka Jylla ka la pynmih ïa u kwai kumba 128,131 metric ton na ka 90,877 hectare ka jaka rep bad ka pisa kaba mih ka long kumba T.994.2 klur ha ki saw snem kata 2019-2020 haduh 2022-2023.
Ïa kane la pyntip ha Ïingdorbar da ka Myntri kaba peit ïa ka tnat rep, ka Kong Ampareen Lyngdoh halor ka jingkylli jong u MLA ka Amlarem u Bah Lahkmen Rymbui ha ka kynta kylli jingkylli jong ka Dorbar Mang Tyngka ha ka Sngi Ba-ar halor ka jingpynmih kwai ka Jylla ha kine ki 4 snem.
Ka Kong Ampareen ka la ïathuh ba ha u snem 2019-2020 ka jaka rep kwai kaba 18,231 hectare ka la pynmih 24,032 MT bad ka pisa T.173.03 klur. Ha u snem 2020-2021, ka jaka rep ka long 18,242 hectare bad ka jingpynmih kwai ka long 24,059 MT bad ka pisa ka long T.235.65 klur.
Ha u snem 2021-2022, ka jingheh ka jaka rep ka long 19,984 hectare bad ka jingpynmih kwai ka long 28,390 MT bad ka pisa ka long T.203.65 klur.
Shuh shuh ha u snem 2022-2023, ka jingpynmih kwai ka long 51,650 MT na ka 34,410 hectare ka jaka rep bad ka pisa kaba mih la long T.382.22 klur.
Lada kheiñlang ïa ka jaka rep, ka jingpynmih kwai bad ka jingmih ka pisa, ka long 90,877 hectare ka jaka rep, ka jingpynmih kwai 128,131 MT bad T.994.2 klur ka pisa ha ki saw snem naduh 2019-2020 haduh 2022-2023.
U Bah Rymbui u la ong ba wat lada nang kiew bad nang bun kiba rep kwai hynrei ka dor ka nang hiar, ha kaba u la kyrpad ïa ka Sorkar ban leh ei ei ban ïarap ïa kiba rep kwai ha Jylla bad ruh ban plielad ha ka ïew ka hat.
Ka Kong Ampareen ka la ong ba ka Sorkar ka ju ïarap ym tang ïa kiba rep kwai hynrei ïa kiwei ki jingthung bad mar rep kynthup ïa ka jingsynreit dawai ban ïada na u khñiang jingpang “bud rot.”
Na ka liang u Myntri Rangbah ruh u la ïeng ban jubab ha kaba u la ïathuh ba ka Sorkar kan nang ai shuh ki jingïarap bad thawlad ban shna eiei na u kwai ban myntoi ki nongrep.
U la ong ba ki don 46 tylli ki processing unit ha kaba 2 tylli ki don ha Amlarem bad lada dang donkam shuh yn buh shuh katkum ka jingdonkam.
