New Delhi, Rymphang 20
Ka Supreme Court, kaba dei ka ïingbishar bahalorduh ha ka Ri, ha ka Sngi Ba-Ar ka la thaw histori da kaba pynlong ïa ka jingñiew ‘vote’ hapoh ïingbishar bad ynda la dep, la pynbna ïa u nongjop da ki nongbishar.
Kane ka dei halor ka ilekshon ban jied ïa u Mayor ka Chandigarh ha kaba ka la mih ka kynrum-kynram namar ka jingleh thok jong u nongpynïaid ïa ka ilekshon lane u Returning Officer (RO). Une u Returning Officer uba kyrteng u Anil Masih, u la pyndonkam bakla ïa la ka bor da kaba pruid ïa ki phra tylli ki kot thep ‘vote’.
Ïa kane ka jingleh jong u Masih, la ïoh ring da ki kor ring dur ha ka sngi ba la pynlong ïa ka jingthep bad jingñiew ‘vote’ ha ka 30 tarik Kyllalyngkot, 2024.
Ha katei ka ilekshon ba la pynïaid da u Masih, la pynbna ba u Manoj Sonkar na ka seng BJP u la jop ïa ka ilekshon Mayor jong ka Chandigarh. La ong ba u Sonkar u la ïoh 16 ‘vote’ katba u kyrtong ka AAP, u Kuldeep Kumar u la ïoh 12 ‘vote’. Ïa ki phra tylli ki ‘vote’ pat, u Masih u la kyntait ban ñiew hadien ba u la dep ban pruid hi.
Katkum ka jinglap jong ka Supreme Court, kine phra tylli ki ‘vote’ ki dei kiba la dei hok ban ïoh da u kyrtong ka AAP.
Namar kane ka kynrum-kynram, u Kumar u la ujor da ka mukotduma sha Supreme Court, bad mynta ka sngi, hadien ba ka ïingbishar ka la dep ban ñiew ïa ki ‘vote’ da kaba kynthup lang ïa kitei ki phra tylli ki ‘vote’ ba u Masih u la kyntait ha ka 30 tarik Kyllalyngkot, ki nongbishar ki la pynbna ba u kyrtong ba la pynïeng da ka AAP u la jop ha ka ilekshon.
Ïa ki lai ngut ki nongbishar la khlieh da u Chief Justice, u DY Chandrachud, bad ki la kyntait ïa ka jingkyrpad jong ka BJP ban pynlong da ka ilekshon bathymmai.
“Ka ïingbishar ka don ïa ka jingkitkhlieh ban pynthikna ba ki kam synshar paidbah kim dei ban kylla nod lyngba ki kam leh thok,” la ong ka Supreme Court.
“Namarkata, ngi sngew ba ka ïingbishar ka dei ban tuklar ha kiba kum kine ki jingjia ba kham pher khnang ban pynthikna ba ka rai ha ka synshar paidbah kan neh kumba ka dei,” la bynrap ka ïingbishar.
Hadien ka jingñiew ïa ki ‘vote’, kitei ki nongbishar ki la pynbna da kaba ong, “U nongmudui u la shah rai kum u nongjop ha ka ilekshon ban long kum u Mayor ka Chandigarh Municipal Corporation.”
Ha kajuh ka por, la hukum ïa u Masih ba u dei ban ai jubab hapoh lai taïew ba balei ka ïingbishar kam dei ban leh eiei pyrshah ïa u namar katei ka jingleh thok ïa ki kot thep ‘vote’.
Namarkata, da ka jingpynbna ïa u Kumar kum u nongjop, ka jingshah jied jong u Sonar ka la shah pyndam noh.
Lah ban kdew ba ki dur khih ki la saphriang kylleng ha ka por ba u Masih u dang pruid ha ki phra tylli ki kot thep ‘vote’. Kine ki dur khih la ring lyngba ki kor CCTV kiba don ha ka kamra ba la pynlong ïa ka jingñiew ‘vote’.
Ki nongbishar kiba la bitar ki la ong ba katei ka jingleh jong u Masih ka dei ka jingpynïap ïa ka jingsynshar paidbah lane ‘Murder of Democracy’.
“Ka long kaba shai kdar na ki dur khih ba u (Masih) u la peit sha ka kor ring dur bad u la pruid ha ki kot thep ‘vote’… Dei ban pynshitom ïa une u ophisar katkum ki aiñ,” la ong u Chief Justice.
