Shillong, Rymphang 20
U MLA ka VPP na Mawlai, Bah Brightstarwell Marbaniang, u la ong ba ka jingïaid jong ki kali heh lyngba ka jingkieng Umrynjah ka lah ban ïalam sha ka jingkhyllem jong ka jingkieng.
“Ka jingmaramot ïa ka jingkieng Dam ka dang ïaid bad kane ka la pynlong ïa kiba bun ki kali ban ïaid na Umrynjah lyngba ka Madan Mawkhar, Umrynjah, Mawsiatkhnam, Nongkohlew haduh Mawtawar. Kane ka la pynwit shi kat dei ïa ki nongshong shnong ba shong ba sah ha kitei ki shnong ” la ong u Bah Marbaniang haba kren hapoh ïingdorbar thawaiñ lyngba ka ‘Call Attention’ halor ka khubor jong ka jingïaid ki trok ba kit palat pud na jingkieng Umrynjah kaba la mih ha kawei na ki lad pathai khubor.
U MLA u la ong ruh ba ka jingkieng ha Umrynjah ka la rim bha bad la pynwandur ïa ka na bynta ka jingkhia kaba tang 9 ton bad kumta ka jingïaid jong ki kali heh lyngba katei ka jingkieng ka lah ban ktah ym tang ïa ka jinglong-jingman jong ka jingkieng hynrei kaba sngewsih ka long ba ka lah ruh ban ïalam sha ka jingkhyllem jong ka.
U la ong ba ka surok na Umden sha Mawsiatkhnam, Nongkohlew shaduh Mawtawar ka dang dei ka surok ‘Single-Lane’ kaba don ïa ka pyngkiang kaba 3.75 mitar bad ka jingsiang rong ïa ka surok ka long katkum ka jingpynwadur ïa ki surok ka Jylla – kata ym na bynta ka ïaid ka ïeng jong ki kali kit mar ba heh.
“La shna ïa ka surok da kaba buh jingmut ba ka lah ban shan tang na bynta ki kali rit bad ba pdeng. Lada ngi peit ïa ka jinglong-jingman jong ka jaka kaba ka surok ka ïaid lyngba, ka long ka jaka lum…kata shi lynter naduh Umjalynshir shaduh Lum-mawsing. Kumta ki kali kit mar ba heh kin shem jingeh shibun ban kiew na kane ka surok,” u la ong.
Haba kdew ba ka jinglong khim jong ka surok ka buh jingma ïa ki nongpyndonkam kaba lah ruh ban ïalam sha ki jingjia aksiden, u Bah Marbaniang u la ong ba kumba ka long mynta, ki don ki jingtip ba la ïoh lum ba ki jingjia aksiden ki jia khah-khah ha kane ka surok namar ka jingbun jong ki kali.
Namar kata, u MLA u la kyrpad ruh ïa u Myntri ba dei khmih ban shimkhia lem ïa katei ka bynta khnang ba kine ki kali heh ba kit mar kim dei ban ïaid lyngba kitei ki shnong lym kumta kan sa buh jingeh, pynwit bad ïalam ruh sha ki jingjia ba sngewsih.
Na ka liang u Symbud Myntri Rangbah ka Jylla ba khmih ïa ka tnad Transport, Bah Sniawbhalang Dhar haba jubab ïa katei ka mat u la ong, “Ïa kane ka mat la pynsngew sha Deputy Commissioner ha ka 12 tarik Rymphang, 2024 da ka Synjuk ki San Dorbar Shnong, ha kaba ki la pyntip ba ha ka Dorbar kaba la pynlong ha ka 1 tarik Rymphang, 2024, ka Synjuk ka la rai ban pyntip sha ki bor ba dei khmih ka Sorkar ba ki don ki trok kiba kit palat pud kiba ïaid lyngba ka jingkieng Umïam-Umrynjah ha ka por mynmiet bad kane ka lah ban pynjulor ïa ka jingkieng kaba long ka lad pynïasoh hapoh shnong.”
U la ong ruh ba hadien ka jingïoh pdiang ïa ka shithi, na ka liang DC ha kajuh ka sngi la thoh sha u Chief Engineer ka tnad PWD (Roads) bad bthah ïa u ban khmih bniah halor ka jinglah ban kit khia kumjuh ban shah ïa ki kali ban ïaid lyngba ka jingkieng Umïam-Umrynjah.
“Haduh mynta, ngi dang ap ïa ka kaiphod na u CE…mar sien pyndep u CE ïa ka jingkhmih bniah, ka DC kan sa pynmih hukum ban pyrkhing ïa ka jingkit khia jong ki kali bad ban ym shah ïa baroh ki kali ba kit palat pud ban ïaid lyngba katei ka surok,” u la ong.
Shuh shuh u Symbud Myntri Rangbah u la kular ba yn sa buddien bad leh eiei noh kloi halor katei ka jingujor.
