Shillong, Rymphang 20
U MLA ka UDP na Mookaiaw, Bah Nujorki Sungoh, u la pyntip hapoh ka ïingdorbar ba ka Sorkar Assam ka la buh biang mynta ïa ka khyrdop khrong pisa na ki nongshong shnong ha ka thaiñ Mukroh.
Ïa kane u Bah Nujorki u la pyntip ha ka por ba u la ïashim bynta ha ka jingïatai halor ka ‘Motion’ kaba la wanrah da u MLA ka Congress na Mawhati u Bah Charles Marngar ha ka Sngi Ba-ar halor ka phang ka jingeh ba mad da ki paidbah ha ki jaka ïakajia pud.
U Bah Nujorki u la ong ba ki paidbah nongshong shnong ka Mukroh ki la mad biang mynta ïa kajuh ka jingeh kaba ki la mad ha ki snem ba la leit namar dang shen ka Sorkar Assam ka la buh biang ïa ka khyrdop lum pisa ha kane ka shnong.
“Ha kine khyndiat sngi, nga la ïoh ka phone call na ki nongshong shnong ka Mukroh ba ka Sorkar Assam ka la buh biang ïa ka khyrdop lum pisa wat la kam shym la thaw ne buh da kaba heh, hynrei ki la buh ka khyrdop kaba rit,” la ong u Bah Nujorki bad bynrap ba ka jingthmu jong kane ka long ban lum pisa na ki nongshong shnong kiba leit sha ki lyngkha rep, leit thohdieng, leit lum rnga bad ki mar rep.
Une u MLA ka Mookaiaw u la pyntip ba kam shym la don satia ka jingmap ïa kino-kino ki kali kiba ïaid lyngba kane ka khyrdop. “Nga la ïakynduh bunsien ïa u Myntri Rangbah ka jylla ban pynpaw halor ka jingdonkam ban weng noh mardor ïa kane ka khyrdop namar ki lyngkha ne ki jaka rep, jaka leit tam dieng ka long shadien jong kane ka khyrdop, kaba kim lah ban kiar haba ki leit naba ki hap ban ïaid lyngba bad ki hap ban siew khajna,” u la ong.
U la ong ba kane ka mat ka long shisha kaba kongsan bha ïa kaba hap ban leh eiei ban nym don kum kine ki khyrdop hapdeng ka shnong Mukroh bad Mukailum khnang ba ki nongshong shnong kin sngew shngaiñ haba ki leit sha ki lyngkha rep.
Nalor kane, u Bah Nujorki u la pyntip ruh kum ka thaiñ Mukroh ka donkam ruh ïa kiwei pat ki jingïarap kiba kyrkieh kum ka bording, ka surok bad kiwei ki kam pynroi namar ki nongshong shnong ki long kiba duk bad ka shnong ka dang sahdien bha.
Namar kata, u la kyrpad ruh ïa ka Sorkar ba kan ai jingïarap shuh shuh sha kito ki ïing kiba ki la duh noh ïa u kpa ka ïing ha ka jingjia shah siat ïap ha shnong Mukroh namar ka la long ka jingeh ïa ka kmie ban pyndap ïa ka ïing ka sem.
