Shillong, Rymphang 20
U MLA ka North Shillong, Bah Adelbert Nongrum, u la wanrah ïa ka mat ban ïakren ha ïingdorbar thawaiñ kaba lai sngi halor ka jingbym ïaid beit ka rukom sam um sha ki nongkyndong lyngba ka skhim Jal Jeevan Mission.
U Bah Adelbert u la wanrah ïa kane ka mat namar ha ka JJM Online Web Portal, ka sorkar la pyni ba ki don palat 651,412 tylli ki longïing hynrei la lah ban sam um haduh 485,927 tylli ki longïing. Pynban katkum ka jingwad jingtip la lap bun na ki longïing ki poi tang ki pipe bad khlem poi um ha ïing.
Namar kata, u Bah Adelbert u la wanrah ïa kane ka mat jingïakren namar u sngewkhia namar ka um ka dei kawei kaba ki briew ki pyndonkam man la ka sngi.
U Bah Adelbert u la wad jingtip ruh ha shnong Thynroit kaba hap ha ki thaiñ nongkyndong bad Mawpat ha khap sor, hangne la shem ba ki pipe ki la poi tangba kim shym la ïoh um.
Na ka liang u Myntri ka Tnat Public Health Engineering (PHE) Marcuise N Marak, u la ong ba ka jingpyntreikam ïa ka Jal Jeevan Mission (JJM) ha Meghalaya ka long kaba seisoh namar ha nongkyndong ki don 651,412 tylli ki longïing bad na kine ki la ïoh um kumba 485,927 tylli.
U la ong ban kynjoh ïa kane ka thong kam shym la long kaba suk khlem ki jingtynjuh kiba bun khamtam eh ha ka liang ka jinglum jingkheiñ bad ai jingtip ban pynrung kyrteng ïa ki longïing hapoh ka jylla.
U la ïathuh ba ka jingsam sha kine 485,927 tylli ki longïing ka kynthup ïa ki 9422 ki skul bad 3625 tylli ki Anganwadi Centre ïa kaba la mang pisa da ka Sorkar Pdeng haduh 90 percent bad 10 percent na ka Sorkar Jylla.
