Shillong, Rymphang:
Ka Khasi Students’ Union (KSU) lyngba ka Educational Cell, ka ai khublei kitbok kitrwiang ïa baroh ki samla pule ka Bri U Hynñiewtrep ki ban sa ïakhun ïa ki eksamin kum ka SSLC, HSSLC bad kiwei-kiwei ki eksamin ha kine ki khyndiat sngi ban wan.
“Ka lawei ba skhem bad ba phyrnai ka shong ha ki samla ka Ri, bad kumta kum ki samla, ngi dei ban kut jingmut bad ban pynshitom ïalade ban pyntikna ba baroh ki kyrdan ba shakhmat kin dei lypa ki jong ngi,” la ong u Chairman ka Education Cell, KSU, samla Pynkmenlang Sanmiet ha ka kyrwoh khubor.
U la ong ruh ba ha kum kane ka juk jong ka thma jabieng, ka seng ka ngeit skhem bad shaniah tylli ha ki khun samla ka Ri ban long ki païa kiba skhem na ka bynta ka lawei.
Kumta ka seng ka kyntu ïa baroh ki samla pule ban trei shitom bad minot ha ki jingpule jong ki, bad khlem artatien ba ka jingtrei shitom kan wanrah ïa ka nam ka burom ïa ka ïing ka sem, ka shnong ka thaw bad ïa ka jaidbynriew hi baroh kawei.
