Shillong, Rymphang 20
Ka ïingdorbar thawaiñ jong ka Jylla ha ka Sngi Ba-ar ka la kyntait ïa ka “The Meghalaya Lokayukta (Amendment) Bill, 2024” ba la wanrah da u nongmihkhmat ka VPP na North-Shillong, Bah Adelbert Nongrum.
Katei ka aiñ rew kaba la wanrah ha ka dur jong ka ‘Private Member’s Bill’ ka thmu ban ïada bad pynkhlaiñ shuh-shuh ïa ka shlem treikam jong ka Lokayukta hapoh ka Jylla, kum shi bynta ban tehlakam ïa ka jingnang kiew ki kam bamsap da ki nongtrei paidbah.
“Ka ‘Private Member’s Bill’ kaba nga wanrah ka thmu ban ïada bad pynkhlaiñ ïa ka shlem treikam jong ka Lokayukta hapoh ka Jylla khnang ban tehlakam ïa ka jingnang kiew ki kam bamsap da ki nongtrei paidbah,” la ong u Bah Nongrum.
U la ong ruh ba ka jingthmu jong katei ka aiñ rew ka long ban pynlong aiñ ïa ki kyndon ba kongsan jong ka Lokpal bad Lokayukta Act kiba la pyndam bad bujli lyngba ka jingwanrah jingkylla (Amendment Act) ha u snem 2021.
“Ka jingthmu ka ong ruh ban wanrah jingkylla ha ka Lokayukta Act ba mynta da kaba pynbun shuh ki bniat khnang ba kan treikam kam bha shuh-shuh,” u la ong.
Haba pynkynmaw ïa ka jingkren jong uwei na ki dkhot ba rangbah jong ka ïingdorbar (Dr. Mukul Sangma) ha ka Lah Sngi U Blei uba la ong, “Ka jingma kaba hakhmat eh ïa ka synshar paidbah mynta ka dei ka bamsap”, u Bah Nongrum u la ong, “Ha kane ka Jylla, ka jingïakhun pyrshah ïa ka bamsap ka la pynlong ïa ki paidbah ban phai khmat tang sha kawei ka shlem kaba la ai sha ngi ïa kata ka jingkyrmen bad kata ka dei ka Meghalaya Lokayukta.”
Haba ban jur halor ka jingdonkam ban ïada bad pynkhlaiñ ïa ka Lokayukta, utei u nongmihkhmat u la ong ba ka jingwanrah jingkylla ha ka Lokayukta Act ha u 2021 ka la pyntroiñ ïa ka jingtreikam hok jong ka Lokayukta hapoh ka Jylla.
“Da kaba wanrah jingkylla haba ïadei bad ka jingkhlaiñ jong ki dkhot ka Lokayukta bad ka jingkynthup ïa ki ‘Judical Bench’ – ba kam ïadei dur shuh bad kaei kaba la long ha ka por ba ka long aiñ. Da kaba shah ban jied ïa ka kynhun dkhot ba shimet tang u Chairperson marwei bad khlem ka jingthung ïa ki dkhot ‘Judicial’, ka jingwanrah jingkylla jong u snem 2021 ka la pyntlot ïa ka jinglong-jingman jong Lokayukta hapoh ka Jylla,” u la ong.
Shuh shuh u MLA u la bynrap ba ka Lokayukta Act ba mynta ka la shah lute noh ïa ki kyndon ba kongsan kiba la tuid na ka Lokpal bad Lokayukta Act jong ka Parliament.
Na ka liang u Lamphang, u Thomas A. Sangma haba pynsngew sha ka ïingdorbar ban ‘vote’ na bynta katei ka aiñ rew, ka ïing ka la kyntait ïa ka.
