Shillong, Rymphang 20
Ka Synjuk Nongñiah Taxi Sor bad Khapsor ki la leit ai jingïarap ïa ka longkmie kaba la buhrieh kyrteng kaba la shitom mynta la ar snem ha shnong Laitlyngkot Lumthangding, East Khasi Hills District kaba la long ha janmiet jong ka 19 tarik u Rymphang, 2024.
Kane ka jingleit ai jingïarap ka dei hapoh ka jingïalam jong u Bah Pynsuk Youroi uba dei Secretary ka synjuk, namar u khun ba dang khynnah uba hap ban leit skul u hap ban pyndep ïa ka kamram ban sharai ïa ki blang ha ka por mynstep bad janmiet.
U Bah Pynsuk u la ong ba ki nongñiah taksi ki dei tang ki nongbylla mynsngi, hynrei ki don ka mynsiem ban ïarap ïa ki paradoh parasnam haba ki ïakynduh jingeh.
U la ong ba kane ka longkmie ka la thiah pang ha ïing la palat ar snem namar kam lah shuh ban ïaid ban ïeng ne ban trei ban ktah kat haduh ba u khun ba dang 10 snem u hap ban mih na ïing dangstep ban leit pyllait ïa ki blang bad set ïa ki ynda la janmiet.
Namar kata, u Bah Pynsuk u la kyntu ïa ki paidbah lada ki sngewsynei kin leit ban noh jingïarap lem ïa kane ka longïing.
