Shillong, Rymphang:
Ka jingpynslem ban thungkam thungjam ïa ki doktor AYUSH hapoh ki jaka ai jingsumar sorkar hapoh ka jylla ka la pynlong ïa kynhun ki doktor kiba don hapoh ka synjuk jong ka Ayush Medical Association of Meghalaya ban leit ïakynduh ïa ka Myntri jong ka sorkar jylla kaba dei khmih ïa ka koit ka khiah, ka Dr. Mazel Ampareen Lyngdoh ban wad jingtip halor kane ka jingpynsahteng.
Katei ka kynhun ki doktor AYUSH hapoh ka ïalam jong u Dr. Alisstar Lyngdoh uba dei u President jong ka Synjuk ha ryngkat ka jingsynranlang da ki para dkhot ki la leit ban ïakynduh ïa ka Myntri ha ka 19 tarik u Rymphang.
Haba kren sha ki lad pathai khubor hadien ka jingwan ïakynduh ïa ka Myntri, u Dr. Alisstar Lyngdoh u la ïathuh ba ka jingpynslem ban thungkam-thungjam ïa ki doktor katkum ka jingtip ba la ïoh na ka tnad ka koit ka khiah ka dei namar ba kam don ka Service Rule na ka bynta ki doktor Ayush.
“Ka jingkylli jong ka Association mynta ka long, balei haduh katne ki snem ba ki jingtreikam ki la don ha ka sorkar jong ki Ayush hynrei kam don ka Service Rule?”, la buh jingkylli utei u President.
U Bah Lyngdoh u la ong ba ka long kaba donkam eh ba ka AYUSH kan don ïa ki Service Rule khnang ba ka jingpynbna ïa ki kam bathylli kan don hynrei dang shen ka khlem don satia ka jingpynbna ïa ki kam bathylli namar ba kam don ka Service Rule.
U Bah Lyngdoh u la ong ruh ba ka jingbym don ka Service Rule ka la ktah shikatdei eh ïa kiba bun ngut ki doktor kiba la trei da ki snem kum ki ‘Contractual’ bad kumta ka long kaba donkam ban don ïa ka Service Rule na ka bynta jong ki ruh.
Na ka liang ka Myntri ka la ong ba kan sa peit bniah halor kane ka bynta bad kan sa khot da ka jingïalang ha ryngkat bad ka Association ha ka 29 tarik u Rymphang, 2024 ban pynbeit ïa ka Service Rule jong ki doktor AYUSH.
