Shillong, Rymphang 20
U MLA ka Congress na Mawhati, Bah Charles Marngar, ha ka Sngi Ba-ar u la pyntip hapoh ka ïingdorbar thawaiñ ka jylla ba ki nongrep synsar ha ka thaiñ khappud ha Block-II ki mad jingeh namar ka jingshah khrong khajna kaba heh ha ka Karbi Anglong Autonomous Council (KAAC).
U Bah Charles u la pyntip ïa kane lyngba ka Motion kaba u la wanrah ha ka Sngi Ba-ar ban ïatai halor ka phang ‘Ka jingeh ba mad da ki paidbah ha ki jaka ïakajia pud’.
Haba wanrah ïa ka Motion, u Bah Charles u la ong ba wat la ka jingïakren pynbeit pud ka dang ïaid shakhmat, hynrei na ka por sha ka por ki briew na ka tnat Forest jong ka Assam, ki pulit Assam bad ka Karbi Anglong Autonomous Council ki ju pyndik ïa ka shongsuk shongsaiñ jong ki paidbah ha ka thaiñ khappud.
U la pyntip ba ka la don ka jingkhrong khajna ïa u synsar da ka KAAC kaba la long shisha ka jingeh kaba khraw ïa ki nongrep. Nalor nangta u la pyntip ba ka khajna kaba ki khrong, kata ïa ka kali Bolero Pick-up ba kit 2000 kilo u synsar la khrong T.15,000, ka kali 4×4 ba kit 1800 kilo u synsar la khrong T.13,500, ka LP trok ba kit 12000 kilo u synsar la khrong T.90,000 bad ka 909 Trok ba kit 9000 kilo u synsar la khrong T.67,500.
U Bah Charles u la ong ba wat la ha ka jingïalang kaba la long mynshem snem ba la ïashim bynta da ki ophisar IAS, IPS bad ki DGP bad la shim ruh ïa ka rai ban don ka shongsuk shongsaiñ, hynrei kane ka jingkular kaba la ai da u DGP sha ki nongshong shnong kam shym la don dor eiei namar ka Assam ka dang ïai bteng ban wan pyndik.
Une u MLA ka Mawhati u la pyntip ruh ba ki pulit ka Assam man ka por ki bteng ban ïaid pahara ha ki shnong Khasi kaba wanrah pat ïa ka jingbym shong shngaiñ jong ki paidbah. Namar kata, u la kyrpad ïa u Myntri Rangbah ka jylla, Symbud Myntri Rangbah ba kin shim khia halor kane bad ban pynthikna ka shongsuk shongsaiñ.
Nalor kane, u Bah Charles u la pyntip ba ha kaba ïadei bad ki kam pynroi ba wanrah da ka Sorkar Meghalaya, kaba sngewsih ka long ba lada thmu tei ïing skul, community hall, anganwadi centre, ki jingkieng ïaid kjat bad kiwei kiwei la wan pynsangeh jubor da ka sorkar Assam bad ka KAAC.
U la ong ba lada wanrah kam pynroi ka Meghalaya la pynsangeh da ka Assam katba da wanrah pat ka Assam ka Meghalaya kam ju tuklar.
Haba ïashim bynta ha kane ka jingïatai, u MLA ka Umsning u Dr Celestine Lyngdoh, u la ong ba ka jingleh jong ka KAAC kam dei shuh ka jinglum khajna hynrei ka la dei ka jingtuh im-im peit-peit naba ym shym la lum tang 200 ne 300 tyngka hynrei da ki phew hajar.
Haba jubab halor ki jingkdew bad pyni jong ki dkhot ka ïingdorbar, u Myntri Rangbah ka jylla u Conrad K Sangma u la ong ba ka jinglum khajna kam shym la urlong ne don satia hapoh Meghalaya.
Ka jinglum khajna da ka KAAC ka lah ban dei ha u pud u sam jong ka hynrei kam dei kaba la lum hapoh Meghalaya, bad kum ka Sorkar ka kren shai ba kan nym ailad satia ïa kum kane ka jinglum ban don hapoh ka Meghalaya.
Ha kaba ïadei pat bad ki jingeh jong ki nongshong shnong kiba mad ha ki khappud ba don jingïakajia, u Conrad u la ong ba kum u Myntri Rangbah u la shimkhia ïa kane ka kam bad la ïakren ruh bad u Myntri Rangbah ka Assam ban kyrpad ban pynbeit ïa ki jingeh.
U la ong ba kum ka sorkar na ka por sha ka por ki la ïakren bad ka Sorkar Assam ha kaba ïadei bad kiba bun ki jingeh kiba ktah ïa ki nongshong shnong ha lynter ki khappud ka Meghalaya bad Assam.
