Shillong, Rymphang 20
U Myntri Rangbah ka Jylla, u Conrad K Sangma, u la pyntip ba ka Sorkar Jylla ka la mang pisa palat T.400 klur na ka bynta ban pyntrei ïa ar tylli ki projek Smart Town hapoh ka jylla.
Kine ar tylli Smart Town kiba ka Sorkar ka la mang pisa ki long ka Tura Smart Town ha kaba la mang haduh T.338 klur ban pyntrei ïa ka bad ka Jowai Smart Town ïa kaba la mang T.79 klur.
U Myntri Rangbah u la pyntip ïa kane haba jubab ïa ka jingkylli ba la wanrah da u MLA ka Congress na Nongstoiñ u Bah Gabriel Wahlang ha ki kynta kylli jingkylli hapoh ka ïingdorbar thawaiñ ha ka Sngi Ba-ar.
Haba wanrah ïa ka jingkylli bynrap, u Bah Gabriel u la kyntu ïa u Myntri Rangbah ban kynthup lang ïa ka Nongstoiñ ruh hapoh ka Smart Town Project, namar ka Nongstoiñ ka dei ka district kaba la rim tam ba la ïoh naduh u snem 1976.
U Conrad u la pyntip ba ka Sorkar ka angnud ban kynthup ïa baroh ki District Headquarter hapoh ka Smart Town Project, bad ïa kane yn sa leh kawei hadien kawei wat la kam pat don satia ka rukom saiñdur ïa kane. Hynrei ïa mynta ka jingmang pisa ka long tang ïa 2 tylli ki Smart Town, kata ha Tura bad Jowai.
