Shillong, Rymphang 20
Ki nongbylla ïing briew kiba don hapoh ka shatri jong ka All Meghalaya Domestic Workers Union, ha ka 20 tarik u Rymphang, 2024 ki la pynkynmaw biang ïa ka sorkar jylla bad buh ruh hakhmat ïa ki jingdawa ha kaba ïadei ban ai jingithuh noh ïa kane ka kam jong ki nongtrei ïing briew kum ka jait kam kaba paw ym kaba rieh .
Haba ai jingkren sha ki lad pathai khubor ha Shillong Press Club, na ka liang ka Vice President jong ka Union, ka Kong Elbina Nongkhlaw ka la ong kaba la pynlong ïa ka kynhun ban dawa halor kane kadei namar ba ki don da ki hajar ngut ki longkmie hapoh kane ka jylla kiba la shim ïa kane ka kam kum ka kam kaba pynim bad ka lad kamai jakpoh ba kin ïoh pynbit pynbiang ïa ka ïing ka sem bad ban phah skul bad ruh ban pynnang pynstad ïa la ki khun ki kti.
Ka Kong Elbina ka la ong ruh ba ka sorkar ka dei ban ai jingithuh noh ïa ki bad ban ai da ki aiñ jingïada kaba khlaiñ ïa ka Union khnang ba ki nongtrei ïing briew kin ym shah ñion beiñ lane shah khñiot bad khnang ba kin ïoh ïa ka jingshngaiñ lada ki mih na shnong ne shabar ban leit trei ïing briew.
Nalor kane ka la ïathuh ba wat la na ka liang ka Union ka la dawa bad ka la phah bun tylli ki dorkhas naduh ki snem 2012 ter ter sha ka sorkar jylla ba kan ai jingithuh noh ïa ki kam ba ki trei khnang ba kin ïoh ïa ki lad jingïada lyngba ka aiñ ba ka sorkar kan thaw na ka bynta ki nongtrei ïing briew, hynrei kine ki jingdawa ki la shu sahkut kumto khlem kino-kino ki jubab hapdeng kine ki 12 snem ki jingdawa jong ka Union.
“Lada ngi don ha ka aiñ ka mut lada ngi mih na ïing ban leit trei sha kiwei pat ki ïing briew, ngin don ïa ka jingshngaiñ watla hapoh shnong lane shabar jong ka shnong”, la ong ka Kong Nongkhlaw.
Shuh shuh ka Kong Elbina ka la ong ba na ka liang ka Union ka la kyrpad ïa ka sorkar ba kan buh ïa ka dor kaba ryngkat khnang ba kum ki nongtrei ïing briew kin lah ban im kumba im lang kiwei.
Na ka liang ka kynhun ka la kyrpad ruh ïa ka sorkar ba kan leh noh da ka ‘Compulsory Registration’ lane ka jinglum lang ïa ki nongtrei hapoh kajuh ka shatri jong ka Union khnang ba kum ka Union kan dang ïohbor shuh-shuh ban pyni bad pynshai ïa ki jingeh kiba kum ki nongtrei ïing briew ki mad bad shem ha ka jaka trei bad ha ka kam kaba ki leh manla ka sngi.
“Haba ngi ïakren ïa kata ngim ong ba ngi kum ki nongtrei ïing briew kiba la don ïa ka kynhun ba ngin long tang kum ki nongdawa hynrei kum ka kynhun, ngi don ïa ka jinghikai kaba ki ai jinghikai ïa ngi kiba la don bad ka Union ba ngin lah ban leit trei ha ïing ki briew da ka akor ka burom ha ka ktien ka thylliej bad wat ha ka riam ka beit ruh bad hakajuh ka por ngi ïoh ka jinghikai ba ngin peit ïa kiba pang ba shitom kumno ba ngin sumar ïa kiba tymmen bad ki khyllung rit”, la ong ka Kong Nongkhlaw.
