Nongpoh, Rymphang 20
Ha kawei ka jingjia kaba sngewtriem kaba la jia ha ka shnong Umtangar ha Ri Bhoi District, uwei u heprit uba dang 10 snem ka rta, la suba ba u la shah pynïap ha ki ‘riew dusmon ki bym lah satia ban tip.
Katkum ka khubor kaba la ïoh, la ong ba ïa ka met ïap jong une u heprit kaba la don ryngkat ki dak mong na ki bynta jong ka khmat la lap shisngi hadien ba u la jah na kawei ka khlaw kaba don marjan bad ka shnong.
Utei u heprit uba la duh noh la ka jingim u dei uba tip kyrteng kum u Kitborlang Marba-niang bad u dang pule Klas 2 ha ka skul LP kaba don ha ka shnong Umlur. U dei ruh u khun ba saw jong u Bah Synshar Nonghyndah bad ka Kong Diona Marbaniang.
U Bah Synshar Nonghyndah u la ïathuh ba u khun jong u, u la mih na la ïing ryngkat bad ki paralok ha ka Sngi Saitjaiñ bad khlem wan phai ïing shuh, bad ïa ka met ïap pat la lap ha ka sngi kaba bud kata ha ka Sngi U Blei na kawei ka khlaw kaba don marjan bad ka shnong.
Na ka liang ki pulit hadien ba ïoh jingtip halor kane ka jingjia, ki la leit ban pynkit noh ïa ka met sha Civil Hospital Nongpoh na ka bynta ban pyndep ïa ka postmortem bad hadien kata la aiti pat sha ki bahaïing ba kin pyndep ïa ka jinglehniam khatduh.
Halor kane ka jingjia, na ka liang ka kmie bad kpa jong utei u heprit, ki la ujor da ka ejahar ha thanat Patharkhmah bad ka jingtohkit ban lapdien ïa ki ‘riew thrang snam kiba la shim ïa ka jingim jong une heprit ka dang ïaid shakhmat.
