Mawkyrwat, Rymphang 20
Kawei ka trok kaba don ïa u nombar ML12-2702 ha ka step phyrngab jong ka Sngi Ba-ar ka 20 tarik, ka la thung baji ha kawei ka riat kaba jrong kumba 120 phut eiei hajan ka shnong Kenïong kaba hap ha South West Khasi Hills District.
Katkum ki tyllong khubor ba la ïoh lum, la ïathuh ba katei ka trok ka dei kaba kit piat. La antad ba katei ka la jia ha ka por mynstep bad u nongñiah jong katei ka trok ba la tip kyrteng kum u Splendar Snaitang, 25 snem na ka shnong Kenïong u la mynsaw bad la pynkit noh wut-wut sha Shillong ban pynïoh ïa ka jingsumar.
Ha kaba ïadei bad katei ka jingjia, ki pulit haduh mynta ki dang pynlong ïa ka jingtohkit ban lap ïa ka daw halor ka jingthung baji jong ka trok ha katei ka riat.
