Shillong, Rymphang 20
U Myntri ka tnat Animal Husbandry & Veterinary, Bah Alexander Laloo Hek, u la pyntip hapoh ka ïingdorbar thawaiñ ka jylla ba kam don kano-kano ka jingburia bailutksan haba ïap ki sniang hynrei ka don ka ‘insurance’ kaba long T.4,000 uwei u sniang.
U Bah Hek u la pyntip ïa kane haba jubab halor ka jingkylli kaba la wanrah da u MLA ka Congress na Mawhati u Bah Charles Marngar ha ki kynta kylli jingkylli ha ka Sngi Ba-ar hapoh ïingdorbar.
Ha ka jingkylli kaba la wanrah, u Bah Charles u la kwah ban tip halor ka jinglong-jingman jong ka jingburia bailutksan sha kito ki nongïoh skhim ri sniang na ka Piggery Mission kiba la duh noh ïa ki sniang namar ka khlam African Swine Fever, ha kaba u Myntri u la pyntip ba kam don satia ka jingburia bailutksan na ka sorkar.
Haba jubab ïa ki jingkylli bynrap, u Myntri u la ong haba ïadei bad kito kiba ïoh ïa ka skhim ri sniang na ka skhim Piggery Mission, ka la don ka jingai tika bad ka jingsiew ïa ka ram kaba ki la shim na bank ki lah ban pyndep hapoh ka 8 snem, hynrei kam don satia pat ban ïarap na ka bynta kito ki sniang kiba la ïap.
Shuh shuh u Myntri u la pyntip ruh ba ha ka por ba ai ïa ka skhim sha kito kiba ri sniang, la dep ban pynshai pura ruh ba ka don ka ‘insurance’ ïa ki sniang kaba shongdor T. 4,000 uwei u sniang lada rit he heh ruh ka juh ka dor ha kaba kum ki nongrep ki lah ban kam.
Katba na ka liang u Nongïalam ka Liang Pyrshah, Bah Ronnie V Lyngdoh haba wanrah ka jingkylli bynrap, u la kyrpad ïa u Myntri ba un ïakren bad u Myntri Rangbahduh ka Ri ha ka ban seng noh ïa ka Veterinary Hospital ha Jylla naba u dei u nongïalam ba la rim bha jong ka BJP na Meghalaya.
Katkum ka jingong jong u, ka jingthmu jong ka Sorkar ban ïarap ïa ki nongrep da kaba sam ïa ki ‘niang khun ka la shah jop noh lada ym shim pat ïa ki lad ban ïada ïa ka jingïap jong ki sniang hapoh ka Jylla.
Ha kaba ïadei bad kane ka jingkyrpad ban tei hospital, u Myntri Rangbah ka jylla u Conrad K Sangma uba la ïeng ban jubab bynrap, u la pyntip ba ka Sorkar ka la tyrwa ïa ka mang pisa kaba T.30 klur ban seng ïa ka Veterinary Hospital ha Upper Shillong bad la phah ïa kane ka jingtyrwa hapoh ka Prime Minister’s Development Initiative for North East Region (PM-DeVINE).
