Nongstoiñ, Rymphang 21
Kawei ka ïing kaba don ha ka shnong New Mawlangsu ha West Khasi Hills ka la ingkhong khait hadien ba ki thylliej ding kiba klang ki la ïoh ban bam duh naphang.
Katkum ka khubor na ki nongïalam shnong la ïathuh ba katei ka jingjia ka la jia ha ka Sngi Balang hynrei ym shym la lah satia ban tip ïa ka daw tynrai halor ka jingkem ding jong katei ka ïing. Kumta la suba jur ba ka lah ban dei na ka jingthut jong ka ding ilektrik.
Shuh shuh la ong ruh ba ha ka jingpluh jong katei ka ïing, baroh ki jingdon jingem ki la ingkhong khait pynban ym shym la don pat mano-mano ba mynsaw.
La ong ruh ba katei ka ïing kaba la shah bam duh ha ka ding, ka dei jong ka Kong Rinsi Lyngkhoi hynrei la ong ba ha katei ka por jong ka jingjia kem ding, ka Kong Rinsi bad u lok ki dang don sha Shillong ban leit shim dawai katba ha katei ka ïing la don tang u kpa jong ka uba dang thiah pang hynrei donbok ba ha katei ka por mar ïa ïohi ïa ka jingpluh jong ka ïing, ki la don ki para marjan kiba la ïoh ban ïarap ban tan ïa u shabar bad u la lait thaw na ka jingmynsaw.
Ki nongïalam shnong ki la ïathuh ruh ba ha katei ka jingjia, ki para marjan bad ki paidbah kiba ïohi ïa ka jingpluh jong katei ka ïing, ki la ïaleh bad pyrshang ban tem hynrei namar ka jingjur jong ka jingklang ka ding, ym shym la lah ban leh eiei shuh bad kumta baroh ki jingdon jingem ki la ingkhong khait.
