Shillong, Rymphang 21
U nongïalam jong ka Liang Pyrshah ha Ïingdorbar Thawaiñ, Bah Ronnie V Lyngdoh, u la ong ba namar bym don ka jaka pule doktor hapoh ka jylla ka la pynlong ïa ki kmie ki kpa ba kin hap ban phah pule doktor ïa ki khun shabar ka jylla bad shabar ka ri India.
U Bah Lyngdoh u la wanrah ïa kane ka mat jingïakren ha ka kynta kylli jingkylli halor ka jingpynkhreh ïa ka Shillong Medical College bad Tura Medical College kaba la shim bynta lang da u MLA ka Nongthymmai Bah Charles Pyngrope, Bah Ardent Basaïawmoit, Bah Lahkmen Rymbui bad ka Miani Shira.
U Bah Lyngdoh u la ong ba lada la lah ban plie ïa ka jaka pule doktor hapoh ka jylla, ka pisa kaba ki kmie ki kpa ki pynlut kan tyllun hi hapoh ka jylla. Hynrei mynta ki kmie ki kpa ki hap ban pynlut shibun ka pisa haba ki phah pule doktor shabar ka jylla bad shabar ka ri India kum sha China, Bangladesh, Ukraine bad kiwei kiwei.
Nalor nangta, u Bah Lyngdoh u la kynnoh ruh ba imat ka Kong Ampareen Lyngdoh ka la bunkam ban ïalap ilekshon bad kam lah shuh ban jubab haba u buh jingkylli halor ka jingpynlut ïa ka jingphah pule doktor shabar ka jylla.
Ka Kong Ampareen Lyngdoh haba jubab, ka la ong ba ka jingkylli halor ka jingpynlut ban phah pule doktor da ka sorkar shabar ka jylla kam shym ïahap namar u nongïalam ka liang pyrshah u buh jingkylli halor ka jingtei ïa ki jaka pule doktor (Medical College) hapoh ka jylla.
Ka la pyntip ba ka sorkar jylla kam shym la thmu ban tei Medical College ha Mawdiangdiang kumba la buh jingkylli da u nongïalam ka liang pyrshah, hynrei ka TB Hospital kaba don ha Umsawli kan long beit kum ka jaka sumar ïa kiba pang TB.
Shuh shuh, ka la pyntip ba ïa ka Shillong Medical College yn sdang na bynta u snem 2025-26 ha Ganesh Das bad Civil hospital, katba ïa ka jingtei ïa ka Tura Medical College ka la ïaid kumba 57 percent kaba la buh thong ban pyndep haduh u Jylliew 2024.
Ha kajuh ka por ka la ïathuh ba katkum ka jingkwah jong ka National Medical Commission ka long 20 akar, hynrei ka Shillong Medical College ka la don haduh 70 akar ka jaka.
