Shillong, Rymphang 21
U Symbud Myntri Rangbah ka jylla, Bah Sniawbhalang Dhar ba khmih ruh ïa ka tnat Commerce & Industries u la pyntip ba ka Sorkar Jylla kan sa ïaleh ban shim rai kloi katba lah la yn khangdam noh ne em ïa ka Mawmluh Cherra Cement Limited (MCCL).
Haba jubab hapoh ka ïingdorbar halor ka jingkylli kaba la wanrah da u MLA ka Nongkrem u Bah Ardent M Basaïawmoit ha ki kynta kylli jingkylli, u Bah Sniawbhalang u la ong ba ka kam ban khangdam noh ïa ka MCCL ha Sohra ka dang don hapoh ka jingbishar jong ka Sorkar.
U la pyntip ruh hapoh ka ïingdorbar ba ïa ka MCCL kaba don haduh 278 ngut ki nongtrei la dep ban khang khyrdep ïa ka jingtreikam jong kane ka karkhana naduh u snem 2020.
Haba jubab ïa ka jingkylli bynrap, u Symbud Myntri Rangbah u la ong ba ka sorkar kan khot ïakren ïa baroh ki kynhun ba ïadon bynta khnang ban lah shim ïa ka rai kaba biang eh. “Nga kular ïa phi ba ngin shim ïa ka rai kaba dei bad yn ym don mano-mano ruh ki ban shah ktah,” u la ong.
U la pyntip ruh ba ka jingïakren halor kane ka kam, ka la long ruh ha ka kyrdan jong u Myntri Rangbah, bad na ka liang jong u ruh u la khot ïa ka jingïalang bad ong ba lada ka sorkar kan shim ïa ka rai ruh kan long ba kan nym ktah ïa ki nongtrei ka MCCL.
Nalor kata, u la ong ba ka sorkar kan sa thaw ïa ki lad ki lynti ban kitkhia ïa ki nongtrei lada ka rai ban khangdam noh ïa ka karkhana.
Ha kaba ïadei bad ki nongtrei, u Bah Sniawbhalang u la pyntip ba kam shym la don shuh ka jingsiew tulop pura naduh ba la khang ïa ka jingtreikam ha u snem 2020 hynrei la siew katkum ka jingïoh pisa.
