Tura, Rymphang:
Ka A’chik Holistic Awakening Movement (AHAM), Adokgre Region ha North Garo Hills, ka la thoh sha u Myntri Rangbah, u Conrad K Sangma, ha kaba ka la dawa ba dei ban pyntreikam noh mardor ïa ka shlem treikam jong ka Community & Rural Development Block kaba don ha kane ka shnong.
Ïa ka Block ha Adokgre kaba don ha North Garo Hills la plie da u Conrad ha ka 15 tarik Naiwieng, 2022, katto- katne bnai shwa ka ilekshon MLA.
Haba pynpaw ïa ka jingkmen ba la plie ïa katei ka shlem treikam jong ka Block ha Adokgre, ka AHAM ka la sngewsih pat ba haduh mynta, kane ka shlem kam pat treikam satia.
Ka Block ha Adokgre ka dei ban peit palat 43 tylli ki shnong bad 10,000 tylli ki longïing longsem. Ka AHAM ka la ong ba jan 99 na ka 100 na ki longïing longsem ki dei kiba im hapoh u laiñ jong ka jingduk lane BPL (Below Poverty Line).
“Kiba bun na ki longïing longsem ki shaniah ha ka rep ka riang ban ïoh bam, bad ki hap ban shong kali kumba 30 km bad ïaid lyngba ka Assam na ka bynta ban leit donkam ha ka Block kaba rim, kata, ka Kharkutta. Kane baroh ka long na ka daw ba ïa ka shlem treikam jong ka Block ha Adokgre ym pat shym la pyntreikam satia wat lada la plie ïa ka ha u Naiwieng 2022,” la ong u President ka AHAM, u Marchborn Marak.
Nalorkata, u la ong ba haduh mynta, ym pat shym la thung kam wat tang ïa uwei u briew ruh ha katei ka Block.
“La shu ieh khunswet ïa ka Adokgre mynta la da ki phew snem, bad ngi kyrpad ban peit ba kane ka Block kan treikam noh mardor. Ngi donkam ïa u BDO, APO bad kiwei pat ki nongtrei. Ngi kyrpad ban pynlong kam noh ïa kane khnang ba ki paidbah kin ïoh jingmyntoi,” la bynrap u General Secretary ka AHAM, u Heman Sangma.
