Shillong, Rymphang 21
U Myntri Rangbah, Conrad K Sangma, u la pynbna katto-katne ki jingtei jingshna ba kham kongsan ha New Shillong Township nalor ka skhim baibam kaba thymmai na ka bynta ki samla pule kiba wan kham shakhmat ha ka jingpule ha ka mang tyngka kaba u la wanrah ha Ïingdorbar ha ka Sngi Balang.
Haba ai jingkren halor ka mang tyngka, u Conrad u la ong ba ka skhim thymmai ka dei ka ban kyrshan ïa ki khynnah skul kiba dei ha ka higher secondary. Ka kyrteng jong ka skhim ka dei ‘Chief Minister’s Scholarship Scheme’ na ka bynta kito ki samla pule kiba kham leh bha bad wan shakhmat ha ka class-XI bad class-XII bad kane kan treikam naduh u snem 2024-25.
U la ong ba lyngba ka Education Mission 2.0 kaba ka Sorkar kan sa pyllait ha u snem 2024-2025, ym sa pynbiang ïa ki jingdonkam kiba kongsan kum ka bording, umbam umdih, ki jaka leit bar nalor ki miej, ki ben, ki des, ha baroh ki skul Sorkar ha kaba la mang `100 klur na bynta kane.
Haba pyntip ba ka Sorkar ka la dep ban shna pynbha ne maramot ïa ki ïing skul Sorkar kiba la shu ieh kumto ha ki snem kiba la leit, u Conrad u la ong ba kum kine ki skul kiba la dep ban pynbha ki don 2,044 tylli bad ki dang don sa 1,725 tylli ki skul Sorkar kiba dang ïaid ka jingmaramot, bad ki kam maramot kiba kham heh kham bun ki dei ha ki skul Secondary bad Higher Secondary kiba la dep kumba 220 tylli bad ki kam ki dang ïaid shaphrang ha ki 100 tylli ki skul.
U Myntri Rangbah u la pynbna ruh ban shna surok na nongbah Shillong sha Administrative City bad Knowledge City ha Mawkhanu ha ka jingmang pisa kaba `520 klur bad nalor ki jingtei jingshna kiba donkam eh ha ka jingmang pisa kaba `365 klur.
Shuh shuh, ïa ki jingtei jingshna na ka bynta ka Administrative City bad Knowledge City ha ryngkat ka jingbuh hakhmat ïa ki jingtei na bynta ki kam ïalehkai, kam jngohkai, Information Technology bad kiwei kiwei la pynkhreh ïa ka DPR kaba kot sha ka `5,400 klur kaba la dep phah sha ka Sorkar Pdeng.
