Shillong, Rymphang:
Ka Sorkar Jylla lyngba ka tnat Transport ka dang wad jaka sa kumba 68 akar na ka bynta ban pynbiang ïa ka jingdonkam ban tei ïa ka kad liengsuiñ ha Baljek kaba don ha Rilum Garo.
Ïa kane la ïathuh da u Symbud Myntri Rangbah uba peit ïa ka tnat transport u Bah Sniawbhalang Dhar haba jubab ïa ka jingkylli ba la wanrah da ka MLA ka TMC ka Miani D Shira ha ka kynta kylli jingkylli jong ka Dorbar Mang Tyngka ha Ïingdorbar Thawaiñ ha ka Sngi ba-ar.
Ka Miani kaba dei ka MLA na Ampati konstitwensi, ka la kylli na ka Sorkar la ka don jingthmu ne em ban pyntreikam noh ïa ka kad liengsuiñ ha Baljek bad kaei ka daw ba kane ka kad liengsuiñ kam shym la treikam haduh mynta.
U Bah Sniawbhalang u la ong ba ka daw ka dei namarba dang donkam jaka shuh na ka bynta kane ka kad liengsuiñ. U la ong ba wat lada ka Sorkar ka la dep shim jaka ha u snem 2013, hynrei ka Airport Authority of India (AAI) ka ong ba dang donkam shuh ïa ka jaka sa kumba 68 akar eiei.
U la ong ba ka jingshim jaka sa kumba 68 akar ka dang ïaid bad ynda la dep yn sa pyntip sha ka AAI bad pan ruh ïa ka Detailed Project Report ban pynkhreh ïa ki jingtei jingshna kiba donkam.
Halor ka jingkylli u MLA na Nongthymmai konstitwensi u Bah Charles Pyngrope halor ka jingheh jong ka jaka bad ka jingjrong ka surok ban hiar bad ban her ka liengsuiñ (run way), u Bah Sniawbhalang u la ong ba kumba ka long mynta, ka jingheh jong ka jaka ka long 120 akar bad dang donkam shim jaka shuh sa kumba 68 akar.
U la ong ba ka jingjrong ka surok (run way) na ka bynta ban hiar bad ban her ka liengsuiñ ka long 1,100 metre bad dang donkam ban pynjrong shuh shuh sha ka 1,750 metre khnang ban lah ki liengsuiñ ATR ban hiar bad ban her ynda la treikam kane ka kad liengsuiñ.
Halor ka jingkylli jong ka Miani lano yn khmih lynti ban treikam ki liengsuiñ bad kin rung ne em hapoh ka skhim UDAN, u Symbud Myntri Rangbah u la kubur ba kane ka dei ban rung hapoh ka skhim UDAN ha kaba u la pyntip ba na ka liang u Myntri Rangbah ka Jylla ruh u la thoh bun tylli ki shithi sha ka tnat liengsuiñ ka Sorkar Pdeng.
U la ïathuh ba ka shithi kaba la thoh khatduh ka dei ha ka 12 tarik Jymmang, 2023 ha kaba ka tnat liengsuiñ ka Sorkar Pdeng ka la jubab ba ym pat don satia kiba kloi ban pynïaid ïa ki liengsuiñ na kane ka kad liengsuiñ ha Baljek.
Kumjuh na ka liang u MLA ka Nongkrem ruh u la kylli katno ka jinglut la pynlut na ka bynta kane ka kad liengsuiñ ka bym pat lah ban pyntreikam, u Bah Sniawbhalang u la ong ba kaba u lah ban ïathuh ka dei tang ka jinglut na ka bynta ban shim jaka biang kata T.3 klur, 1 lak 59 hajar namar um lah ban ai jingtip lut halor ki jinglut jingsep baroh.
