Shillong, Rymphang 21
Kawei ka ‘riewniam (Sister) kaba trei ha West Garo Hills, ka la shah kren tohmet bad shah pynhiar jubor na ka bos ha Assam ha kine ki khyndiat sngi.
Kane ka long katkum ka jingpyntip jong u Lyngdohsad bynrap (Auxiliary Bishop) ka jylla niam Tura, u Rt. Rev. Jose Chirackal, ha ka Sngi Balang.
Ha u kyrwoh, u Lyngdohsad bynrap u la ong ba katei ka ‘riewniam ka dei kaba la tip kyrteng kum ka Sister Rosemary bad ka trei ha St. John’s Parish kaba don ha ka shnong Siju.
Ha ka 17 tarik Rymphang, katei ka ‘riewniam ka la dei ban leit na Dudhnoi sha Goalpara. Ka la kiew ha kawei ka bos kaba leit na Dudhnoi sha Goalpara bad ka la dep ruh ban siew lut ïa ka pisa kaba dei ka bai shong bos. Ka jingjngai na Dudhnoi sha Goalpara ka long kumba 30 km eiei.
“Tang hadien katto-katne por ba ka la shong ha ka bos, u nongpynïaid bos (Conductor) lem bad kiwei pat kiba la don lang ha ka bos, ki la sdang ban kren tohmet ïa katei ka ‘riewniam halor ka rukom riam bad ka jingngeit ka jong ka. Hadien katto-katne por, la pynsangeh ïa ka bos ha kawei ka jaka ba kynjah, bad la phah hiar jubor ïa kata ka ‘riewniam na ka bos,” la ong u Rt. Rev. Chirackal.
Nalor nangta, u la ong ba katei ka jingjia ka la ktah jur ïa ka jingmut jingpyrkhat jong ka Sister Rosemary kum ka ‘riewkynthei bad ka ‘riewniam. Hynrei u la ong pat ba ki la don katto-katne ngut ki briew kiba la ïarap ïa ka Sister Rosemary ba kan ïoh da kawei pat ka bos ban leit sha Goalpara.
U Lyngdohsad bynrap u la ong ba ki don bun ngut ki ‘riewniam, shynrang bad kynthei, ha Assam kiba phong ïa ki jaiñ kiba ki dei ban phong kumba long ha kiwei pat ki bynta jong ka Ri. U la ong ruh ba ka jingpyndik ïa ki briew kiba phong ïa ki jaiñ jong ki ‘riewniam ka long ka bym pat ju ïohsngew mynshwa.
“Hynrei kiba kum kine ki wan jia namar ka jingpynsaphriang ïa ki jingtip kiba lamler pyrshah ïa kano-kano ka niam/jingngeit. Ka dei ka kamram jong ka sorkar ba kan shim ïa ki sienjam ban teh lakam ïa kiba kum kine ki jingjia bad jingpynsaphriang ïa ki jingtip ba lamler bad ban pynthikna ba ka jinglong-jingman ka dei kaba shongsuk bad kaba baroh ki briew na ki jait niam/jingngeit bapher-bapher ki im hapdeng ka jingsuk,” la ong u Rt. Rev. Chirackal.
Nalorkata, u la ong ba ki don bun ngut na Meghalaya kiba leit sha Assam namar ki jingdonkam bapher-bapher. Napdeng kine ki nongleit, u la ong ba ki don kiba phong ïa ki jaiñ jong ki ‘riewniam lane ki deng ïa ki jingdeng kiba pyni ïa ka jingngeit ka jong ki.
Na ka liang u Lyngdohsad bynrap u la kyntu ïa ka sorkar Meghalaya ba kan ïakren bad ka sorkar Assam halor kane ka jingjia bad kiei pat ki jingjia ba ïasyriem khnang ba kin ym jia shuh hadien habud.
