Shillong, Rymphang 21
U Myntri Rangbah ka Jylla, Conrad K Sangma, u la ong ba kam dei ka jingkitkhlieh jong ka Sorkar Jylla ban siew ïa ka tulop jong ki nongtrei ki District Council (JHADC & GHADC).
Haba jubab halor ka jingïatai halor ka jingkren lamphang u Lat ka jylla hapoh ka ïingdorbar, u Myntri Rangbah u la ong ba ka sorkar kam lah ban siew tulop ïa ki nongtrei ka council bad kam long satia kaba dei ban kynnoh ïa ka sorkar halor ka jingbym lah siew tulop ïa ki nongtrei jong kitei ar tylli ki district council, namar ki dei ki shlem treikam kiba treikam laitluid bad ka dei ka kamram jong kito kiba la shah jied ban pynïaid ïa ka District Council.
U Myntri Rangbah u la ong ban shu pynkitkhlieh beit ha ka sorkar kam long kaba ïahap satia, hynrei ha kawei pat ka liang ka sorkar ka don ka jingkitkhlieh kumno ban wad bad thaw ki lad ban kyrshan namar ba ki dei ki jaka treikam ban pynneh pynsah ïa ka tynrai kiba don hapoh ka jylla.
U Conrad u la ong ba ka don ka jingïaleh kaba heh haba ïadei bad kine ki district council namar haba ai ka pisa sha ki bad haba ka bhah ka wan, bad kaba donkam ka long ba kin pyndonkam hapoh kumno ban pynjanai ïa ka rukom treikam. U la ong tang ha GHADC ki don haduh 1577 ngut ki nongtrei bad ka jingïapher kaba don ka long ba ka pisa kaba ïoh lum manla u bnai bad ka jingsiew tulop ka long haduh kumba 3 klur ne 4 klur tyngka. Haba shu shim jingkheiñ kyllum ka jingïoh jong ki ka long hapdeng ka 1.5 klur haduh 2 klur shi bnai bad ka jingpynlut ha ka jingsiew tulop bad kiwei kiwei ka kot sha ka `5 klur shi bnai, kaba dei tang jong ka GHADC.
U la ong ba ka JHADC ruh ka mad ïa kum kane kajuh ka jingeh. Kumta kum ki council ki dei ban don ka rukom ïaid kaba janai bad ruh ban dei ban shim ki rai ba kham eh ban ïaleh kumno ban pynduna ïa ka jinglut jingsep ha kaba ka sorkar ruh kan lah ban kyrshan ha ka ban pyni lynti bad kyrshan ha kaba ïadei bad ka pisa haba don, kata ruh da kaba bud ïa ki kyndon kiba don.
