Shillong, Rymphang 22
Ki skul shimet hapoh ka jylla ki don palat 2,637 tylli, ki semi private/adhoc skul ki don 2,016 tylli, ki skul Deficit ki don 2,157 tylli, ki skul sorkar ki don 2,611 tylli, ki skul SSA ki don 5,135 tylli bad kiwei pat ki don 32 tylli.
Ïa ka jingdon jong kine skul hapoh ka jylla la jubab da u Myntri ka tnat pule-puthi ka jylla, u Rakkam A Sangma ha ka kynta kylli jingkylli ba la buh da u Bah Synshar Kupar Thabah uba dei u MLA ka UDP na Sohïong konstitwensi kaba la long ha ka Dorbar Mang Tyngka ha ka 20 tarik Rymphang.
Namar ka kynta kylli jingkylli ka long tang hapoh shi kynta, hynrei kane ka jingkylli kaba la buh da u Bah Synshar ym shym la lah ban ïatai namar ka por ka la kut noh haba ïatai ïa kiwei ki jingkylli kiba la buh kham hakhmat. Pynban na ka liang u Myntri ka tnat pule puthi u la ai ka jubab da ka jingthoh ha ïingdorbar.
Ki skul baroh hapoh ka jylla naduh ki skul shimet, ki Semi Private, Deficit bad ki skul sorkar ki don palat 14,588 tylli.
U Bah Synshar u la buh ruh ïa ka jingkylli katno tylli ki skul kiba la ïasoh ha ka ICSE,CBSE bad MBOSE hapoh ka jylla, u Rakkam u la ïathuh ba ki don saw tylli ki skul ha ka ICSE, 7 tylli ha CBSE bad MBOSE ki long 945 tylli.
Nalor nangta, u Bah Synshar u la buh jingkylli ruh ïa ka jingdon ki Higher Secondary School ha ki thaiñ nongkyndong bad u Myntri ka tnad pule-puthi u la jubab ba ki skul shimet ki don 183 tylli, semi private/adhoc skul ki don 87 tylli, deficit ki don 19 tylli, ki skul sorkar ki don 25 tylli, ki SSA ki don 2 tylli bad kiwei pat ki don 14 tylli, bad baroh ki long 330 tylli.
