Shillong, Rymphang 22
U Symbud Myntri Rangbah barim, Bah Bindo M Lanong, ha ka Sngi Palei u la ong ba ka jingpynshai i Kong Ampareen Lyngdoh, Myn -tri ka tnat ka rep ka riang, hapoh ka Ïingdorbar Thawaiñ ba ïa u shynrai Lakadong, la dep ïada lypa ïa ka jinglong trai ki nongrep Lakadong, ba la dep ïoh ïa kata ka Geographical Indication (GI) Tag No. 741 ha u bnai Naiwieng 2023 na u Registrar na Chennai, ba kiwei ki nongrep kim lah shuh ban rep, kam long kaba biang.
Ha u kyrwoh khubor, u Bah Bindo u la ong ban kham shai sha ki nongrep baroh, kynthup khamtam ïa kiba na Lakadong, Jaiñtia Hills, katei ka GI Tag kan ym ïarap ïa katei ka jingthmu, hynrei kaba donkam eh ka long kumno ba ka tnat ka rep ka riang kan peit ban pynrung kyrteng (register) noh hapoh ka aiñ Patents Act, 1970 jong ka Sorkar India bad ka Amendment 2005, kaban ithuh ïa ka hok ki nongrep kiba shem nyngkong ïa u symbai bad ka rukom rep ïa utei u shynrai, kaban ym lah ban kam trai da kiwei pat ki nongrep, hynrei kin ïoh hi ïa kajuh ka hok ban rep kat shaba ki kwah, lait noh tang ban kam trai na ki nongrep bad ka jaka ba rep nyngkong, kata ka mut ïa ka Lakadong, Jaiñtia Hills, kaban ïoh nyngkong ïa ka nam ‘Patent’, kum ki nongshem nyngkong ïa utei u shynrai bad ïa ka buit rep ïa u ha katei ka jaka rep ha Jaiñtia Hills.
