Nongstoiñ, Rymphang 22
Ka Hynñiewtrep National Youth Movement (HNYM) West Khasi Hills ha ka Sngi Palei ka la ïoh bat noh ïa uwei u briew ba la kynnoh ba u la kam ïalade ba u lah ban pynïoh kam lyngba ka DSC da kaba u la shim pisa ruh haduh ₹20,000 na u Bah Sunday Rimait.
Ïa utei u briew ba la ïoh bat da ka HNYM la tip kyrteng kum u Dominik Marweiñ uba shongkha ha ka shnong Proiñ kaba dang hap hapoh ka Mawshynrut Civil Sub Division.
U President ka HNYM West Khasi Hills, Bah Tailanstar Lyngkhoi, u la ïathuh ba ïa katei ka jingjia, la wan ban ujor sha ka seng da u Bah Sunday, ba u la shah thok khlem da ïoh ïa kata ka kam. Kumta ka seng hapoh ka jingïalam ka jong u, ka la leit mar-mar ban wad ïa utei u briew ha ïingsah jong u bad la ïoh ban bat noh ïa utei u briew.
Shuh shuh u la ïathuh ruh hadien ka jingtohkit jong ka HNYM, u la phla ba u la shim ïa ka pisa na u Bah Sunday bad u la kular ruh ban siew noh hapoh ka shitaïew ha ryngkat ki jingïathoh soskular bad u la soi ruh ïa la ka kyrteng ban pynshisha hakhmat ka seng.
U Bah Tailanstar u la ong ruh ba lada une u briew um siew hapoh ka shitaïew ïa kaba la buh, ka HNYM kan shim da kiwei pat ki sien jam.
U la ong ba ka HNYM ka kyntu ruh ïa ki paidbah ba kin long kiba husiar na ki briew kiba kular ïa kiei kiei bad ban shu ngeit khlem da wad bniah la ka long ne em kaba shisha.
