Tura, Rymphang 22
Ki pulit ka jylla ki la sdang ban tohkit halor ka jingmih jong kawei ka jingpynbna khubor ha rynsan ‘Social Media’ kaba la kam ba ka kynhun pyntriem jong ka Garo National Liberation Army (GNLA) ka la mih pyrthei biang.
Kane ka jingpynbna khubor ka la saphriang bad la soi ïa ka da uwei u briew ba la pynithuh ïalade kum u Goera Pantora Sangma. U la kam ruh ba u dei u ‘Chairman’ jong ka ‘GNLA – Regroup’ kaba dei ka kyrteng bathymmai jong katei ka seng pyntriem.
Haba ïakren bad u SP ka West Garo Hills, u Dawa Aswaghosh, u la ong, “Ka dang kloi than ban ong eiei mynta namar ka tnat pulit ka dang tohkit halor kane. Ngin sa lah ban ai jingtip kaba bniah ha ki khyndiat sngi.”
Ki tyllong khubor na ka tnat pulit ki la pynpaw ïa ka jingsngewlyngngoh ba ka GNLA ka la mih pyrthei biang.
Lah ban kdew ba mynshem snem arngut ki briew ki la shah kem hadien ba ki la buh ïa ki dur bad ki dur khih ha ki rynsan ‘Social Media’ bad ki la kam ruh ba ka GNLA ka la don 500 ngut ki dkhot bathymmai ba la shim na South Garo Hills bad West Khasi Hills. Kita ki arngut ki la kam ruh ba ki dei ki nongïalam jong kane ka seng pyntriem.
Hynrei kham hadien ka la paw ba kitei ki arngut ki la shu kam ba ki dei na ka GNLA namar ka jingthmu jong ki ka long ban lute pisa.
Na ka liang jong uwei pat u dkhot barim ka GNLA u la kyntait ba ka don shisha kata ka jingpyrshang ban pynkhie im ïa kane ka seng.
“Kumba ka long mynta, ka jingtreikam jong ki pulit ka khlaiñ bad ym sngewlah ban ngeit ba ka GNLA kan khie im biang. Ngi sngew ba kane ka jingkam ba mynta ruh ka lah ban long ka jingpyrshang jong ki katto-katne ban kamai pisa. Hynrei ngin sa shah khot hajir bad hap ban jubab ïa ki jingkylli khlem kino-kino ki nongrim,” la ong une u dkhot barim ka GNLA uba khlem kwah ban pynpaw kyrteng.
Ha katei ka kyrwoh khubor, la pyntip ba la thaw ïa ka ‘GNLA – Regroup’ ha ka 7 tarik Rymphang 2023. Ki mat jong kane ka seng, katkum u kyrwoh khubor, ki kynthup ïa ka jingpynkut ïa ki kam bamsap ha Rilum Garo, jingpyntreikam ïa ki skhim na ka bynta ki baduk, jingpyntreikam ïa ka Garo Customary Law, Inner-Line Permit bad kiwei.
