Shillong, Rymphang 22
U Myntri ka tnat Bording u Abu Taher Mondal ha ka Sngi Palei u la ai ka jingkular ba yn sa pynïoh ïa ka bai lutksan sha ka ïing jong u nongap pahara miet uba la khlad na ka jingshah bat bording ha ka sub-station kaba don ha Umïam.
Haba jubab halor ka Call Attention ba la wanrah da u MLA ka Mawlai u Bah Brightstarwell Marbaniang hapoh ka ïingdorbar u AT Mondal u la ong, “Nga la shim khia ïa kane ka kam bad ka MeECL bad kular ruh ba kan don ka jingsiew bai lutksan sha ka ïing jong u rangbah ba la khlad.”
U Myntri u la ong ba une u briew uba la khlad uba la tip kyrteng u Kyrshanborlang Muktieh, um dei u nongtrei ka MeECL hynrei u dei u nongtrei ka M/s ITD Cementation India Limited, uba trei ap pahara miet bad u la shah bat bording ha ka miet 29 tarik hadien ba u la rung shapoh ka sub-station bad ïoh ban tyngkhuh bad u waiar ba dang don ding.
U Myntri u la pyntip ruh ba la dep ban ujor ejahar ha thanat Mawlai bad ba dang ap ïa ka kaiphod jong ki pulit.
Ha kajuh ka por, u la pyntip ba ïa ka kaiphod jong ka jingjia ha ka 29 tarik, la dei ban aiti ruh sha u Senior Electrical Inspector jong ka Sorkar Jylla ba un pynlong ka jingtohkit khnang ban tip ïa ka daw tynrai.
U Mondal u la ong ba ka kaiphod jong u Senior Electrical Inspector kaba la dep leh, la ong ba ïa utei u rangbah la lap ba u la thiah khlem tip briew shuh hapoh ka sub-station da ki pulit kiba dang don ha ka kam pahara ha jingkieng Dam bad mar-mar ki la pyntip sha ki briew jong ka ITD Cementation India Limited.
Shuh shuh na ka liang u Myntri u la pyntip ba ka MeECL ka la kyrpad ïa ka M/s ITD Cementation ba kan pynsted noh ha ka ban pyllait ïa ka jingïarap pisa kum ka EPF bad ka insurance sha ka ïing ka sem, naba utei u rangbah u la khlad ha ka kam.
