Shillong, Rymphang 22
Ki MLA ka Liang Pyrshah ha ka Sngi Palei ki la dawa na ka Sorkar Jylla ba kan thung da ka ‘Independent Inquiry Commission’ ban bishar bad khmih bniah ïa ki jingshisha baroh ha kaba ïadei bad ka jingpyntrei ïa ka skhim Jal Jeevan Mission (JJM) hapoh ka jylla.
Ïa kane ka jingdawa la wanrah da u MLA ka Congress na Umsning u Dr Celestine Lyngdoh ha ka Sngi Palei hapoh ka ïingdorbar lyngba ka Resolution, ha kaba u la pynpaw ruh ka jingbynñiaw halor ka rukom pyntrei ïa ka skhim Jal Jeevan Mission (JJM), ha kaba ka jingpyntreikam ka la long kaba bun ki jingduna suda.
U Dr Celestine u la ong ba kaei kaba paw ha ka jingthoh bad kaei kaba paw ha madan ha ka jingpyntreikam ïa ka skhim JJM ka long kaba ïapher bak-ly-bak namar ki bun sa tang ki jingduna.
Une u MLA ka Umsning u la ong, ba wat la kam shym la don ka jingpyntreikam kaba pura ne katkum ka jingdonkam ban pyntrei hynrei ki kontraktor pat ki la ïoh ka ‘bill’ kaba pura.
U la ong ba ka jingdawa bad donkam ban don da ka Independent Inquiry Commission ka long namar ba kane ka dei ka prokram kaba heh jong ka Sorkar India bad ha kaba ka jingbei pisa ruh ka la long da ki spah bad hajar klur, kumta khlem kane ka jingtohkit yn nym lah ban tip ïa kaei ka long ka man sha madan.
U la ong ka jingduna kane ka la paw ha kylleng ki bynta jong ka jylla, ha kaba u la ong ba don ruh kiba la leit wat ban tied ïa ka jingkhang jong u Lokayukta ba kan phah tohkit, hato dei tang ka Lokayukta ka ban pynbeit ïa ka jingeh jong ka JJM.
U Dr Celestine u la ong ba la sakhi ba ka jingtrei ka la ïaid bad dep ha jan man ki shnong hynrei kawei kaba kongsan tam pat kaba paw ka long ba watla ki pipe um ki la poi sha ki thliew ïing hynrei kaba jah pat dei ka um. Ka sorkar ka la buh ka kyntien FHTC ha kane ka prokram kaba mut Functional Household Tap Connection hynrei kane kam shym la urlong naba kaba jah dei ka um.
Une u MLA ka Umsning u la ong, ba ha ka FHTC la dei ban pyndait sa uwei u dak, kata u N ban pynlong pura ïa ka jingpyntrei kaba pura jong kane ka skhim JJM, kata ba kan long NFHTC ne ka Non Functional Household Tap Connection.
U Myntri ka tnat PHE u Marcuise N Marak haba jubab u la ong ba ka jingdawa ïa ka jingtohkit Independent Inquiry kam long kaba donkam namar naduh ba la sdang ïa ka skhim JJM hapoh ka jylla, kiba bun ki la ïoh jingmyntoi ba ka tyllong kan poi haduh ki thliew ïing.
