Shillong, Rymphang 22
Ki dkhot jong ka seng Congress bad Trinamool Congress ha ka Sngi Palei ki la pynpaw ïa ka jingsngewkhia kaba jur halor ka jingshah kren tohmet bad jingshah pynhiar jubor napoh bos ïa kawei ka ‘riewniam kaba dang don ha lynti na Dudhnoi sha Goalpara, Assam, ha ka 17 tarik Rymphang, bad ki la pynrem jur ruh ïa kane ka jingjia.
Mynta ka sngi, u MLA ka Nongthymmai, u Bah Charles Pyngrope, u la wanrah da ka ‘Zero Hour’ halor katei ka jingjia hadien ka jingpynmih khubor.
Na ka liang u Myntri Rangbah, u Conrad K Sangma, u la ïathuh ba ka sorkar ka la don jingtip halor katei ka jingjia bad ma u hi dalade u la ïakren bad u Myntri Rangbah ka Assam, u Himanta Biswa Sarma, uba la kular ba ka sorkar Assam kan sa leh eiei pyrshah ïa kiba donkti.
“Hynrei, kumba ka long mynta, katei ka ‘riewniam kam pat lah ban ai lut ïa ki jingtip bakongsan ha kaba ïadei bad katei ka jingjia. Haduh mynta, ngi dang tip tang ïa ka tarik, por bad jaka, hynrei ngim don ka nombor jong ka bos ba ka la shong,” la ong u Conrad.
Na ka liang u Bah Charles u la pynpaw ba katei ka ‘riewniam (Sister) ka dei kaba trei ha Rilum Garo bad ka la shah kren tohmet bad shah pynhiar jubor na ka bos ha Assam ha ka 17 tarik Rymphang. U la kyntu ïa ka sorkar jylla ba kan ïakren bad ka sorkar Assam halor kane ka jingjia khnang ba kan ym jia shuh hadien habud.
Katei ka ‘riewniam ka dei kaba la tip kyrteng kum ka Sister Rosemary bad ka trei ha St. John’s Parish kaba don ha ka shnong Siju, South Garo Hills.
Ha ka 17 tarik Rymphang, katei ka ‘riewniam ka la dei ban leit na Dudhnoi sha Goalpara. Ka la kiew ha kawei ka bos kaba leit na Dudhnoi sha Goalpara bad ka la dep ruh ban siew lut ïa ka pisa kaba dei ka bai shong bos. Ka jingjngai na Dudhnoi sha Goalpara ka long kumba 30 km eiei.
Tang hadien katto-katne por ba ka la shong ha ka bos, u nongpynïaid bos (Conductor) lem bad kiwei pat kiba la don lang ha ka bos, ki la sdang ban kren tohmet ïa katei ka ‘riewniam halor ka rukom riam bad ka jingngeit ka jong ka. Hadien katto-katne por, la pynsangeh ïa ka bos ha kawei ka jaka ba kynjah, bad la phah hiar jubor ïa kata ka ‘riewniam na ka bos.
Nalor nangta, katei ka jingjia ka la ktah jur ïa ka jingmut jingpyrkhat jong ka Sister Rosemary kum ka ‘riewkynthei bad ka ‘riewniam. Hynrei ki la don katto-katne ngut ki briew kiba la ïarap ïa ka Sister Rosemary ba kan ïoh da kawei pat ka bos ban leit sha Goalpara.
Na ka liang u nongïalam ka Liang Pyrshah, u Bah RV Lyngdoh, u la ai da ka jingthoh sha u Myntri Rangbah lyngba u Lamphang halor katei ka jingjia.
