Shillong, Rymphang 22
U Myntri Rangbah ka jylla, Conrad K Sangma, ha ka Sngi Palei u la pyntip hapoh ka ïingdorbar ba ka sorkar ka la pynlut haduh palat T. 2 klur tyngka na ka bynta ki 23 tylli ki jingïalang sorkar ba la pynlong ha Hotel Taj Vivanta JW Courtyard.
U Myntri Rangbah u la pyntip ïa kane haba jubab ïa ka jingkylli ba la wanrah da u MLA ka Mawkynrew u Bah Banteidor Lyngdoh ha ki kynta kylli jingkylli.
U Conrad u la ong ba ka jingpynlut ïa ka pisa kaba la kot sha ka T. 2,13,96,000 ka la long na ka bynta ki jingïalang ba la pynlong da ki tnat treikam bapher bapher, kaba la siew ruh da kito ki tnat kiba la pynlong ïa ki jingïalang bad pyntip ba ka jingpynlut kaba bun eh ka dei na ka bynta ka jingïalang G-20 kaba la kot sha ka T. 62 lak eiei.
U Myntri Rangbah u la ong ba ka jingdon jong kine ki ar tylli ki ïing basa san khlur ha ka thaiñ Khyndailad ka la long shisha ka burom bad ka jingsarong ïa ka jylla ha kaba la lah ban pynlong ïa ki jingïalang kiba heh.
Halor ka jingkylli bynrap, u Conrad u la ong ba ka jingdon jong kine ki ar tylli ki hotel ym tang ba ka la long ka burom ïa ka jylla, hynrei ha kaba la lah ruh ban ai kam haduh 80 haduh 85 persen tam eiei ïa ki samla trai jylla.
U la ong ba ki don bun bha ki prokram jong ka sorkar bad ym dei ba la phai khmat tang sha kine ki ar tylli ki ïing basa hynrei ka sorkar na ka por sha ka por ka pynlong ruh ki jingïalang ha State Convention Centre, Pinewood bad kiwei kiwei ki hotel.
U Myntri Rangbah u la ong ba na ka liang ka Sorkar ka pynshlur ïa ki samla kiba don ka jingtip bad jingshemphang ha kum kine ki jait kam ba kin seng ïa la ki kam, naba na ka liang jong ka sorkar ka la wanrah bun ki prokram bad khamtam lei ka CM Elavate.
