Shillong, Rymphang 22
U MLA ka VPP na North Shillong, Bah Adelbert Nongrum, u la sah marwei ha Ïingdorbar haba u wanrah ïa ka rai lane ‘resolution’ ban ïatai na ka bynta ban pynwan biang ïa ka aiñ Meghalaya Lokayukta Act (amendment) 2021 sha ka aiñ kaba rim jong u snem 2014 haba ïadei bad ka jingdon ki dkhot ka Meghalaya Lokayukta.
U Bah Adelbert u la wanrah ïa ka ‘resolution’ ha kaba u la dawa ban pynkylla ïa ka kyndon hapoh ka aiñ Lokayukta jong u snem 2021 sha ka aiñ jong u snem 2014 khnang ba ka Lokayukta kan treikam pura da kaba thung 5 ngut ki dkhot.
Hynrei ha ka por ba u Bah Adelbert u wanrah ïa kane ka mat ha Ïingdorbar u khlem ïoh satia ka jingkyrshan na kiwei pat MLA khamtam na ki MLA kiba dei lang na kajuh ka seng (VPP).
U Bah Adelbert u la ïeng ban kren marwei halor kane ka mat ha kaba u la kdew ba ka Meghalaya Lokayukta ka donkam ban treikam lyngba ka jingdon jong 5 ngut ki dkhot ym ban treikam tang u Shongknor ka Lokayukta marwei.
U la ong ba ka Lokayukta ka dei ban khlaiñ ha ka jingtreikam ban tehlakam ïa kino-kino ki kam bamsap namar ka bamsap ka dei ka jingma kaba khraw tam. U la ong ba donkam ban pynkylla biang sha ka aiñ barim jong u snem 2014 khnang ban don 5 ngut ki dkhot bapura.
Hadien ba u Bah Adelbert u la dep ban kren, u Symbud Lamphang ka Ïingdorbar u la khot ïoh dang don ki MLA kiba shimbynta lang, hynrei ym don satia mano-mano ruh ba ïeng ban kyrshan ïa u Bah Adelbert.
Kumta u Myntri Rangbah Conrad K Sangma u la ïeng ban jubab ïa kane, da kaba pynshai ba ka Lokayukta ka treikam bha mynta ym kum mynshwa ba ka Lokayukta kam lah ban treikam lada pat ïoh haduh 5 ngut ki dkhot.
Namarkata, u Myntri Rangbah u la ong ba ka aiñ kaba pynbeit ha u snem 2021 ka ïarap shibun ban pynkhlaiñ ïa ka Lokayukta khamtam ba kan lah ban treikam noh khlem da ap haduh ban da dep thung lut ïa ki dkhot baroh 5 ngut.
U la pynshai shuh ba mynshwa ka Lokayukta ka khlem lah ban treikam wat haba la don u Shongknor (chairperson) ka Lokayukta tang namar bym pat don lut ki dkhot kumba la kdew ha ka aiñ jong u snem 2014.
Hynrei ynda la pynkylla ïa ka kyndon hapoh jong kane ka aiñ ha u snem 2021, ka Lokayukta ka la lah ban treikam wat lada ym pat don lut ki dkhot.
“Ka Meghalaya Lokayukta mynta ka la lah ban treikam wat lada don tang 2 ne 3 ngut ki dkhot khlem da ap haduh ban da thung lut ïa ki dkhot baroh san ngut, namar ym don jingteh ban thung pat kham hadien ia kiwei ki dkhot,” u la ong.
U la bynrap ba ka Lokayukta ka la treikam mynta bad la ïohpdiang ruh ki jingujor kiba ïadei bad ka jingkynnoh bamsap.
Kumta u Myntri Rangbah u la kyrpad ïa u Bah Adelbert ban weng noh ïa kane ka ‘resolution’ namar ka jingpynkylla kaba la leh ha u snem 2021 ka dei hi na ka bynta ban ailad ïa ka Meghalaya Lokayukta ban khlaiñ ha ka jingtreikam bad mynta ruh ka treikam bha.
Hynrei u Bah Adelbert um treh ban weng bad u la ong ba u ïeng beit ha ka nongrim ba donkam ban pyntreikam ïa ka Lokayukta da kaba thung haduh san ngut ki dkhot.
Namarba une u MLA ka North Shillong um weng, u Symbud Lamphang ka Ïingdorbar uba pynïaid ïa ka Dorbar, u la buh hakhmat ka ïing ban ai rai la yn pdiang ne kyntait ïa kane ka resolution, ha kaba ka ïing ka la kyntait.
