Shillong, Rymphang 22
U Symbud Myntri Rangbah ka jylla, Bah Prestone Tynsong uba khmih ruh ïa ka tnat Kam Pohïing, u la pyntip ha ïingdorbar ba ka jingbuh ïa ka Fire Service ha Mawryngkneng ka dang ïaid ha ka jingpynkhreh.
U Bah Prestone u la pyntip ïa kane haba jubab ïa ka jingkylli kaba la wanrah da u MLA ka Mawryngkneng u Bah Heavingstone Kharpran ha ki kynta kylli jingkylli, bad u la ong, shisien ba la dep ka jingaiti ïa ka jaka da u District Collector sha ka tnat pulit, ka jingpynkhreh ban tei ïa ka jingtei ruh kan sa sdang noh.
U Bah Prestone u la pyntip ba ka jingheh jong ka jaka ka long haduh 2,000 square meter bad ka jingmang pisa ka long haduh T. 51 lak. U la ong ruh ba ka jingthied ïa ka jaka ka la jan dep artad bad kam shym la don satia kano-kano ka soskular ba la ïateh bad ki trai jaka.
Ha kaba ïadei bad ka jingpynslem ban buh ïa ka Fire Service, u Symbud Myntri Rangbah u la ong ba ka dei namar ka jingbym pat ïoh jaka hynrei u la ai ka jingkular ba ka tnat ka la ïaid ha ka jingpynkhreh.
